Uqandalı fəal: “Mən Azərbaycanda baş tutacaq COP29-da mütləq iştirak edəcəyəm”

Moda sənayesi ətraf mühitə çox zərər verib. Bununla da iqlim dəyişikliyinə töhfə vermək üçün çoxlu “səylər” göstərib. Buna görə də, COP28 iştirakçıları konfrans çərçivəsində moda nümayişi keçirmək və bütün bunların qarşısını almağın mümkün olduğunu nümayiş etdirmək qərarına gəliblər. Moda yalnız cəlbedici deyil, eyni zamanda təbiətə qarşı diqqətli ola bilər.

"Report"un Dubaya ezam olunmuş müxbiri xəbər verir ki, bunu "Miss Ətraf mühit Afrika" ​​titulunun sahibi, uqandalı model və fəal Cudit Herd deyib.

“İqlim dəyişikliyinin mənfi təsirləri səbəbindən böyük çətinliklər yaşayan Uqandadan gəlirəm. Biz bu problemlərin necə həll oluna biləcəyini, dünyanın qlobal istiləşmə ilə necə mübarizə aparacağını bilmək istəyirik. Mən gəncləri iqlim dəyişikliyi ilə mübarizədə fəal iştirak etməyə təşviq etmək niyyətindəyəm. Bu mürəkkəb problemləri təkcə hökumətlər və rəsmilər həll etməməlidir”.

Uqandalı model qeyd edib ki, gələn il Azərbaycana COP29-da səfər etmək istəyir: "Mən mütləq iştirak edəcəm. İndi hərəkətə keçməyin vaxtıdır. COP hara gedirsə, biz də onun ardınca gedəcəyik".

Fəal həmçinin qeyd edib ki, o, Uqandanın Qoşulmama Hərəkatına sədrliyinə böyük ümidlər bəsləyir: “Estafeti pandemiya zamanı inkişaf etməkdə olan ölkələr üçün peyvəndlərin əlçatanlığı uğrunda mübarizə aparan Azərbaycandan alacağıq. Düşünürəm ki, Uqanda sədrliyi dövründə ekoloji problemləri aktiv şəkildə həll edəcək”.

Qeyd edək ki, dekabrın 11-də BMT-nin İqlim Dəyişikliyi üzrə Çərçivə Konvensiyasının Tərəflər Konfransının - COP29-un 29-cu sessiyasının gələn il Azərbaycanda keçirilməsi rəsmən elan edilib.