Fuad Nəcəfli: Ermənistanın ekoterroru nəticəsində Sədərəkdə "Şir arxı"nda balıqlar məhv olub

Ermənistan təbiət əleyhinə yönələn əməllərini hələ də davam etdirir. Son zamanlar ekoterror nəticəsində Sədərək rayonunda "Şir arxı"nda balıqlar məhv olub.

"Report" xəbər verir ki, bu sözləri "Ekoloji su hüquqpozmalarının iqlim dəyişikliyinə təkan verməsi" mövzusunda elmi-praktiki konfransda Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli deyib.

O bildirib ki, Ermənistanın dağ-mədən sənayesi Azərbaycanın ekoloji mühitinə ciddi mənfi təsir göstərir.

Səlahiyyətli nümayəndənin sözlərinə görə, Ermənistan tərəfindən metalların zəhərli tullantıları həm Araz çayına, həm də “Şir arxı”na axıdılmaqla burada olan yüzlərlə köçəri quş və balıq məhv olub:

"Araz çayının Ermənistan tərəfindən çirkləndirilməsi bu gün də davam edir. Bu isə Arazqırağı ərazilərdə fauna və floranın məhvinə səbəb olur. Demək olar ki, artıq bir çox bitki və heyvanların təbiətdən yox olması təhlükəsi yaranıb. Son zamanlar aparılan müşahidələr zamanı müəyyən edilib ki, çayın suyu qatılaşıb, rəngi dəyişilib. Bütün bunlara baxmayaraq, Ermənistan təbiət əleyhinə yönələn əməllərini hələ də davam etdirir. Son zamanlar həmçinin, ekoterror nəticəsində Sədərək rayonunda "Şir arxı"da balıqlar məhv olub. Eyni zamanda, Şahbuz rayonunda minaya düşən yerli vətəndaşın xəsarət alması Ermənistanın məkirli siyasətinin nəticəsidir".