Qustavo Alfaro: "Bu qələbə vacib bir uğurun başlanğıcı olacaq"

"İnamlı qələbə qazandıq. Ümid edirəm ki, bu qalibiyyət vacib bir uğurun başlanğıcı olacaq".

"Report"un məlumatına görə, bunu Ekvador millisinin baş məşqçisi Qustavo Alfaro Qətərdə start götürən dünya çempionatında ev sahiblərinə 2:0 hesabı ilə qalib gəldikləri açılış oyunundan sonra mətbuat konfransında deyib.

Argentinalı mütəxəssis bildirib ki, 3-cü dəqiqədə vurduqları ilk qolun ləğv edilməsi onlar üçün psixoloji zərbə olub: "Buna baxmayaraq, növbəti dəfə fərqlənmək üçün yollar axtarırdıq".

Alfaronun sözlərinə görə, Qətərlə oyun mundialın ən vacib görüşü idi: "Təkcə starta görə demirəm, həm də ev sahiblərinə qarşı oynadıq. Bəzən bir qələbə ilə tarixi mifləri məhv edirsiniz. Çox böyük öhdəliyimiz var və bu, bizə qalib gəlməyə imkan verdi".