DÇ-2022: Evi qarət olunan futbolçu İngiltərə millisinə qayıdır

Londondakı evinin qarət edilməsi səbəbindən Qətərdəki dünya çempionatında mübarizə aparan İngiltərə millisini tərk edən "Çelsi"nin futbolçusu Rahim Sterlinq düşərgəyə qayıdacaq.

“Report”un İngiltərə Futbol Assosiasiyasının (EFA) saytına istinadən məlumatına görə, 28 yaşlı hücumçu dekabrın 9-da yenidən kollektivlə məşqlərə qoşulacaq.

Təcrübəli oyunçunun adı DÇ-2022-nin 1/4 final mərhələsində Fransa ilə keçiriləcək matçda millinin iştirak ərizəsinə salınacaq. Qarşılaşma dekabrın 10-da olacaq.

Qeyd edək ki, silahlı soyğunçular tərəfindən evi qarət olunduğu üçün EFA-dan icazə alaraq ailəsinin yanına gedən Rahim Sterlinq mundialda Seneqala 3:0 hesabı ilə qalib gəldikləri 1/8 final matçında da iştirak etməyib.