İcraçı direktor: "Azərbaycanda heç vaxt dini ayrı-seçkilik olmayıb"

"Azərbaycanda heç vaxt dini ayrı-seçkilik olmayıb".

"Report" xəbər verir ki, bunu Bakı Beynəlxalq Multikulturalizm Mərkəzinin (BBMM) icraçı direktoru Rəvan Həsənov Zəfər Gününün ikinci ildönümünə həsr edilən "Biz birlikdə güclüyük" mövzusunda keçirilən konfransda çıxışı zamanı deyib.

O qeyd edib ki, Prezident İlham Əliyevin rəhbərliyi ilə Azərbaycan Ordusu 44 günlük Vətən müharibəsində parlaq Zəfər qazanıb: "Bizim haqq savaşımıza mane olmaq üçün bəzi dövlətlər əllərindən gələni etsələr də, bacarmadılar. Bu müharibədə hər bir Azərbaycan vətəndaşı həmrəy, birlikdə oldu. Müharibə dövründə olan əhval-ruhiyyə Ordumuzun haqq savaşı apardığını göstərirdi. Torpaqlarımız işğaldan azad edildikdən sonra həmin ərazilərdə böyük infrastruktur layihələri icra olunur. Amma düşmən yenə də bizə mane olmaq istəyir. Ərazilərimizdə ermənilər tərəfindən basdırılan minalar bu prosesləri ləngidir”.

İcraçı direktor bildirib ki, Azərbaycan hər zaman ədalətsizliyə qarşı mübarizə aparıb: "Heç vaxt ölkəmizdə dini ayrı-seçkilik olmayıb. Son yüz ildə bizim qədər böyük qələbə qazanan ölkə yoxdur. Dağıdılmış ərazilərimizi heç kimin köməyi olmadan sıfırdan bərpa etmək böyük potensial tələb edir, bunu da Azərbaycan dövləti bacarır”.

Sonra ölkədəki dini-milli icmaların nümayəndələrinin Vətən müharibəsində göstərdikləri birliyi əks etdirən “Biz birlikdə güclüyük” adlı videoçarx nümayiş olunub.

Daha sonra çıxış edən Qafqaz Müsəlmanları İdarəsi(QMİ) sədrinin müavini Fuad Nurullayev, Bakı Dağ Yəhudiləri Dini İcmasının rəhbəri Melih Yevdayev, Mənəvi Dəyərlərin Təbliği Fondunun icraçı direktorunun müavini Ceyhun Əliyev, Talış icmasının ağsaqqalı İmamverdi Həmidov, Rus Pravoslav Kilsəsinin Bakı Yeparxiya İdarəsinin katibi protoiyerey Mefodiy Elnur Əfəndiyev, "Azərbaycan-Avar” İctimai Birliyinin sədri Məhəmməd Nooyev, Alban-Udi Xristian dini icmasının sədri Robert Mobili və digərləri Zəfər Günü münasibətilə konfrans iştirakçılarını, Azərbaycan xalqını təbrik edib, şəhidlərə rəhmət diləyiblər. Azərbaycanda olan milli-dini icmaların nümayəndələrinin bir yerdə və həmrəy olduqlarını vurğulayıblar.

Şəhidlər Babək Ramaldanov, Dmitriy Solnsev, Xaliq Əzizzadə və Füzuli Əliyevin ailə üzvləri çıxış edərək onların döyüş yolundan danışıb, Azərbaycanın suverenliyi uğrunda mübarizədə göstərdikləri qəhrəmanlıqları qeyd ediblər.

Çıxış edən qazilər bildiriblər ki, Azərbaycan uğrunda döyüşdükləri üçün qürur hissi keçirirlər.