Venesuela Kanadadakı səfirini geri çağırıb

Bakı. 18 oktyabr. REPORT.AZ/ Venesuelanın Kanadadakı səfiri Vilmer Barryentos Cənubi Amerika dövləti rəhbərliyinin qərarı ilə geri çağırılacaq.

“Report” TASS-a istinadən xəbər verir ki, bu barədə çərşənbə axşamı öz "Twitter" mikrobloqunda respublikanın xarici işlər naziri Xorxe Arreasa yazıb.

"Bildirirəm ki, prezident Nikolas Maduro Kanadadakı səfirimiz Vilmer Barryentosu məsləhətləşmə üçün geri çağırmaq qərarına gəlib", - deyə XİN rəhbəri bildirib.

Bundan əvvəl elə həmin gün Kanadanın XİN rəhbəri Xristya Friland Venesuela hakimiyyətinin 15 oktyabr regional seçkiləri ilə bağlı narahatçılığını ifadə etmişdi. Onun fikrincə, seçkilər zamanı çoxsaylı qanun pozuntularına yol verilib.