Uqandanın Baş naziri: İnkişaf etmiş ölkələr qlobal iqlim dəyişikliyinə görə məsuliyyət daşıyırlar

İnkişaf etmiş ölkələr dünyada baş vermiş iqlim dəyişikliklərinə görə məsuliyyət daşıyırlar.

“Report” xəbər verir ki, bu barədə Uqandanın Baş naziri Robina Nabbanca Dubayda keçirilən BMT-nin İqlim Dəyişikliyi üzrə Çərçivə Konvensiyasının (COP28) 28-ci Tərəflər Konfransı çərçivəsində jurnalistlərə açıqlamasında deyib.

Onun sözlərinə görə, Uqandada istixana qazları tullantıları minimal olsa da (qlobal tullantıların cəmi 0,010 %-i), ölkə artıq ekstremal hava şəraitinin təsirini hiss edib:

“Uqanda təbiətlə bərəkətlidir, lakin indi ölkə tez-tez daşqınlarla üzləşir. Uqandanın bəzi hissələrində həddindən artıq quraqlıq, isti kimi ekstremal hava şəraiti müşahidə edilir. Bütün bunlar inkişaf etmiş ölkələrin həyata keçirdiyi emissiyaların nəticələridir”.