ABŞ prezidenti Donald Tramp Konqresə ölkənin Ümumdünya Səhiyyə Təşkilatından çıxması ilə əlaqədar rəsmi bildiriş göndərib.

“Report”  RİA “Novosti”yə istinadən xəbər verir ki, bu barədə senator Bob Menendes deyib.

“Bu, amerikalıların həyatını və (onların - Red) maraqlarını qorumayacaq. Amerikanı xəstə və tək qoyacaq” - deyə senator “Twitter” səhifəsində yazıb.

Senator Trampın hərəkətlərini “xaotik və uyğunsuz” adlandırıb.

“Avropa İttifaqının (Aİ) liderləri özlərini xilas etmək üçün Ukraynadakı münaqişəni uzatmağa çalışırlar, çünki sülh gələrsə, uğursuz siyasətlərinə görə cavab verməli və istefaya getməli olacaqlar”.

“Report” xəbər verir ki, bu sözləri Macarıstanın hakim partiyasının rəsmi nümayəndəsi Tamaş Mençer Kossuth radiostansiyasında çıxışı zamanı deyib.

O, Aİ liderlərinin təşkilatın üzvü olmayan Ukraynanın xeyrinə icma ölkələrinin maraqlarına məhəl qoymamasını absurd adlandırıb:

“Onlar bunu özlərini xilas etmək üçün edirlər. Çünki sülh gələrsə, Rusiyaya qarşı müharibə ilə bağlı pis qərarların və sanksiyaların, Ukraynaya ayrılan 150 milyard avronun taleyinin hesabını verməli olacaqlar, həmçinin siyasi məsuliyyəti öz üzərlərinə götürüb istefa verməlidirlər ki, bunu açıq şəkildə istəmirlər”.

Qazaxıstanın Manqistau vilayətinin Fort Şevçenko şəhəri yaxınlığında Xəzər dənizi sahilində 117 ölü suiti aşkarlanıb.

“Report” xəbər verir ki, bu barədə ölkənin Kənd Təsərrüfatı Nazirliyinin balıqçılıq komitəsi məlumat yayıb.

Qeyd olunub ki, ölmüş heyvanlar Tupkaraqan rayonunda Fort Şevçenko şəhərinin Asan, Mıs Bautin və Mıs Urdyuk ərazilərində tapılıb:

“Cəsədlərin parçalanmasına baxsaq, tapılan suitilər ötən ilin noyabr-dekabr aylarında ölüb. Suiti səcədləri yığılaraq sanitar normalara riayət etməklə poliqonda məhv edilib”.

Vurğulanıb ki, 2024-cü ilin noyabrından tapılan ölü suitilərin ümumi sayı 2194-ə çatıb.

Xəzər suitisi endemikdir və bu dənizin faunasında məməlilərin yeganə nümayəndəsidir. Onun əsas qida mənbəyi balıqlar, əsasən kilkə, aterinkimilər, həmçinin molyuska və krevetlərdir. Bu heyvanların yaşam tərzi mövsümi miqrasiya ilə xarakterizə olunur: onlar qışda dənizin şimal hissəsində cəmləşir, istilərin başlaması ilə Orta və Cənubi Xəzər dənizinə köç edirlər.

2023-cü il oktyabrın 7-dən İsrailin Qəzza zolağında həyata keçirdiyi əməliyyatlar nəticəsində həlak olanların sayı 54 minə yaxınlaşıb.

“Report” xəbər verir ki, bu barədə Fələstin anklavının Səhiyyə Nazirliyi məlumat yayıb.

“Son 24 saat ərzində 38 ölü, həmçinin 204 yaralı Qəzza zolağındakı xəstəxanalara yerləşdirilib. Qəzzanın şimalındakı xəstəxanalara giriş çətin olduğu üçün onların məlumatları təqdim olunan statistikaya daxil edilmir. 2023-cü il oktyabrın 7-dən İsrailin hərbi əməliyyatları nəticəsində ölənlərin sayı 53 939 nəfərə çatıb, daha 122 797 nəfər yaralanıb”, - deyə məlumatda qeyd olunub.

Liberiya bayrağı altında üzən “MSC ELSA 3” konteyner gəmisi Hindistanın cənubundakı Kerala ştatının Koçi şəhəri sahillərindən 38 dəniz mili aralıda Ərəb dənizində batıb.

“Report” xəbər verir ki, bu barədə Hindistan Sahil Mühafizəsi məlumat yayıb.

Qeyd olunub ki, təhlükəli yük daşıyan gəmidə 13-ü təhlükəli yük, 12-si kalsium karbid olmaqla 640 konteyner olub.

Gəminin çənlərində həmçinin 84,44 ton dizel yanacağı və 367,1 ton mazut olub.

Mövcud məlumata görə, konteyner gəmisi anbarlarından birində su basması nəticəsində tamamilə batıb. Eyni zamanda yanacağın dağılması riski var. Artıq gəminin bütün 24 ekipaj üzvü təhlükəsiz şəkildə xilas edilib

“The Indian Express”in məlumatına görə, gəminin kapitanı rusdur, ekipajda həmçinin iyirmi Filippin, iki Ukrayna və bir Gürcüstan vətəndaşı var. 1997-ci ildə inşa edilmiş MSC Elsa 3 konteyner gəmisinin uzunluğu 184 metr, eni isə 25,3 metrdir.

Milli Fəlakətlərin İdarə Olunması İdarəsi sahil sakinlərinə batmış gəmiyə aid ola biləcək və dalğalar tərəfindən sahilə yuvarlana bilən obyektlərdən uzaq durmağı tövsiyə edib.

İsrail çərşənbə günündən etibarən 100 yük maşınının Qəzza zolağına daxil olmasına icazə verib, lakin bu, anklavın iki milyon sakini üçün lazım olan yardım səviyyəsindən çox uzaqdır.

“Report”un xəbərinə görə, bu barədə Qətərin “Al Jazeera” telekanalı Fələstin rəsmilərinə istinadən məlumat yayıb.

Qeyd olunub ki, Ümumdünya Ərzaq Proqramı Qəzzada kəskin ərzaq çatışmazlığı barədə xəbərdarlıq edib və anklavda 70 mindən çox uşağın qida probleminin olduğunu bildirib.

Xatırladaq ki, mayın 19-da İsrail hökuməti anklavda aclıq təhlükəsinin qarşısını almaq üçün Qəzzaya əsas ərzaq ehtiyatlarının idxalına icazə verəcəyini açıqlayıb.

Qəzza hökumətinin hesablamalarına görə, sakinlərin ən əsas ehtiyaclarını ödəmək üçün anklavda hər gün humanitar yardım daşıyan 500-ə yaxın yük maşını gəlməlidir.

Avstraliyanın şərq sahillərində leysan yağışların səbəb olduğu güclü daşqınlar və çayların daşması səbəbindən ən azı 32 min insan təcrid olunmuş vəziyyətdədir.

“Report” xəbər verir ki, bu barədə Yeni Cənubi Uels Dövlət Fövqəladə Hallar Xidməti “X” sosial şəbəkəsindəki səhifəsində məlumat verib.

Vurğulanıb ki, 14 şəhər və qəsəbə tamamilə blokadadadır: “Ştatın şimal sahillərinin 32 minə yaxın sakini sel suları səbəbindən təcrid olunmuş vəziyyətdədir. Xidmət, giriş bərpa olunana qədər bu ərazilərdə ərzaq ehtiyatlarının artırılmasına üstünlük verəcək”.

Əhaliyə kömək etmək və daşqınların nəticələrini aradan qaldırmaq üçün ölkənin digər rayonlarından da təcili xilasetmə dəstələrinin səfərbər edildiyi bildirilir.

ABŞ-da Amerika lideri Donald Trampın qərarlarını bloklayan federal hakimlər onun tərəfdarlarından çoxsaylı təhdidlər almağa başlayıblar və təhlükəsizlik xidmətlərini özləri idarə etmək istəyirlər.

“Report” xəbər verir ki, bu barədə “Wall Street Journal” öz mənbələrinə istinadən məlumat yayıb.

Mart ayında Vaşinqtonda keçirilən qapalı iclasda 50-yə yaxın hakim yeni Amerika administrasiyasının siyasətinə zidd olan qərarlara görə üzləşdikləri təhlükələri müzakirə edib.

Xüsusilə, qəzetin yazdığı kimi, onlarla hakim və onların qohumları təhdid paketləri və bomba hədələri alıb, naməlum şəxslər Trampın doğuşdan vətəndaşlığın ləğvi ilə bağlı fərmanının qarşısını alan hakimin iqamətgahına xüsusi polis qüvvələri çağırıb.

ABŞ Ali Məhkəməsinin özünün təhlükəsizlik xidməti var və digər federal hakimləri Ədliyyə Departamentinin nəzarətində olan Marşal Xidməti tərəfindən qorunur. Hakimlər qorxurlar ki, Trampa tabe olan Ədliyyə Nazirliyi onların təhlükəsizliyini ləğv edə bilər, çünki onlar Amerika liderinin siyasətlərinin həyata keçirilməsinə mane olurlar.

Kolumbiyanın qərbində tələbələri daşıyan avtobusun baryerə çırpılması nəticəsində azı 10 nəfər ölüb.

“Report” TASS-a istinadən xəbər verir ki, bu barədə qəza qurbanlarının təhsil aldığı Aleksandr fon Humboldt Universiteti məlumat yayıb.

"Avtobusda 22 tələbə, iki müəllim və müəssisəmizin rabitə şöbəsinin əməkdaşı olub", - rektor Dieqo Xaramilyo Lopez universitetin instaqramdakı səhifəsindəki müraciətində deyib.

Təhsil müəssisəsi yeddi tələbə və üç universitet əməkdaşı olmaqla, ölənlərin siyahısını açıqlayıb. “Caracol” telekanalının məlumatına görə, qəza nəticəsində 8 tələbə ölüb.

Təcrübədən qayıdan tələbələri daşıyan avtobus körpünün baryerinə çırpılıb. İlkin məlumata görə, sürücü idarəetməni itirib.

Amerika vətəndaşlarının əksəriyyəti hesab edir ki, ABŞ Prezidenti Donald Trampın tətbiq etdiyi gömrük rüsumları onların maliyyə vəziyyətinə mənfi təsir edib.

"Report" xəbər verir ki, bunu "The Harris Poll" tədqiqat xidmətinin “Bloomberg” agentliyi üçün keçirdiyi ictimai rəy sorğusunun nəticələri sübut edir.

Araşdırmaya görə, respondentlərin 56 %-i hesab edir ki, Trampın tarif siyasəti olmasaydı, ailə büdcəsi daha yaxşı olardı. Respondentlərin 52 %-i hesab edir ki, ABŞ hökumətinin vəd etdiyi gələcək faydalar mövcud iqtisadi problemlərə dəyməz. Amerikalıların 69 %-i tariflər nəticəsində qiymətlərin artacağını gözlədiklərini bildirib.

Sorğu mayın 8-10-da keçirilib və 2 000-dən çox amerikalı iştirak edib.

Britaniyanın müxalif Mühafizəkarlar Partiyasının yüksək vəzifəli üzvləri torilərin reytinqinin az olması fonunda keçmiş baş nazir Boris Consonu siyasətə qayıtmağa çağırırlar.

"Report" xəbər verir ki, bu barədə "The Sun" qəzeti partiya rəhbərliyindəki mənbələrə istinadən məlumat yayıb.

“Boris Consonun köhnə qvardiyasının bəzi təmsilçiləri ona yazır və geri qaytarılması ilə bağlı danışıqlar aparır”, - mənbə bildirib. Başqa bir yüksək səviyyəli partiya xadimi Consonun siyasətə mümkün qayıdışı ilə bağlı torilərin qərargahında iş aparıldığını söyləyib. Qəzet əlavə edib ki, bu cür söhbətlər partiyanın aşağı reytinqi fonunda fəallaşıb.

“YouGov” sosioloji şirkətinin mayın 20-də yaydığı sorğunun nəticələrinə görə, Mühafizəkarlar Partiyası populyarlıq baxımından dördüncü yerə düşüb: respondentlərin yalnız 16 %-i ona səs verməyə hazırdır. Naycel Farajın rəhbərlik etdiyi sağçı populist Böyük Britaniyanın Reform Partiyası (29 %) seçicilərin ən böyük dəstəyinə malikdir, ondan sonra hakim İşçi Partiyası (22%) və Liberal Demokratlar (17%) üçüncü yerdədir.

Leyboristlər Partiyası 2024-cü ilin iyulunda ümumi seçkilərdə 650 yerlik İcmalar Palatasında (parlamentin aşağı palatası) 412 yer qazanaraq hakimiyyətə gəlib. 2010-cu ildən hakimiyyətdə olan Mühafizəkarlar Partiyası İcmalar Palatasında cəmi 121 yer qazanıb, bu, indiyə qədərki ən pis nəticədir. Bundan sonra torilərin lideri Rişi Sunak istefa verib.

Almaniyanın Hərbi Dəniz Qüvvələri (Dəniz Qüvvələri) üçün altı ədəd f126 sinif freqatın inşasının tamamlanması ən tez 2030-cu ilə qədər təxirə salınır.

“Report” xəbər verir ki, bu barədə Almaniyanın “Kieler Nachrichten” (KN) qəzeti mənbələrə istinadən məlumat yayıb.

Almaniyanın Hərbi Dəniq Qüvvələri ilk dörd freqatı 2020-ci ildə, daha ikisini isə 2024-cü ilin iyun ayında Niderlandın gəmiqayırma şirkəti “Damen Naval”dan cəmi 9 milyard avroya sifariş edib, gəmilərin birincisi 2028-ci ildə işə salınmalı idi.

"Hərbi Dəniz Qüvvələrini yeni fəlakət gözləyir: donanmanı döyüş gəmisi olaraq gücləndirməli olan altı yeni sinif 126 freqatın inşası təxirə salınacaq. Hazırda insayderlər 2030-cu il üçün tamamlanma tarixi üzərində işləyirlər ", - məqalədə deyilir.

Nəşr iddia edir ki, niderlandlı podratçı sifarişin azı 70 %-nin Alman Gəmiqayırma zavodlarında yerinə yetirilməli olduğu müqavilənin şərtlərindən narazıdır. Ancaq nə Almaniyanın Hərbi Dəniz Qüvvələrinin nümayəndələri, nə də gəmiqayırma şirkəti ortaya çıxan çətinlikləri açıq şəkildə şərh etməyə və yeni dəqiq tikinti bitmə tarixlərini adlandırmağa hazırdır.

Pakistan əhalisinin sıx məskunlaşdığı Pəncab əyalətində fırtına olub.

“Report” xarici mətbuata istinadən xəbər verir ki, fırtına zamanı köhnə və baxımsız binaların çökməsi nəticəsində 10 nəfər ölüb, daha 45 insan xəsarət alıb.

Qeyd edilir ki, təbii fəlakət bir sıra şəhərlərə güclü ziyan vurub. Pəncab əyalətinin Jelum, Lahor, Ravalpindi, Şeyhupura, Nankana Sahib, Sialkot, Mianvali şəhərləri təbii fəlakətdən ən çox zərər çəkib. Güclü külək Lahorun bir çox ərazilərində ağacları yıxıb, xeyli sayda evə, mağazaya və nəqliyyat vasitəsinə ziyan dəyib.

Dövlət orqanlarının nümayəndələri ölənlərin ailələrinə maddi yardım göstəriləcəyini bildiriblər. Karaçidən Lahora uçan, özəl aviaşirkətə məxsus FL-842 reysinin təyyarəsi eniş zamanı fırtına ilə üzləşib. Güclü külək səbəbindən eniş edə bilməyən təyyarə yenidən havaya qalxaraq Karaçiyə qayıdıb.

Pəncabda fövqəladə vəziyyət elan edilib. Hakimiyyət orqanları fırtınadan zərər çəkən bölgələrdə təcili tədbirlər görülməsini tapşırıb.

ABŞ-nin vitse-prezidenti Jey Di Vens bildirib ki, Amerika universitetlərinin bir çoxunun rəhbərliyi əhalinin ağdərili və asiyalı hissələrinə qarşı qəsdən irqi ayrıseçkilik edir.

"Report" xəbər verir ki, o, bu barədə fikirlərini “X” sosial şəbəkəsində yazıb.

Vensin sözlərinə görə, ölkənin təhsil və elm sektorunda fundamental tədqiqatların kommersiya sferasında tətbiqinə mane olan ciddi bürokratik problemlər var.

"Bütün bunlara əlavə olaraq, bir çox universitetlər açıq şəkildə irqi ayrıseçkiliklə (əsasən ağdərililərə və asiyalılara qarşı) məşğul olurlar, bu ölkədə vətəndaş hüquqları qanunlarını pozur", - o yazıb.

"Universitetlərimiz Tramp administrasiyasının siyasətlərini bu problemlərin həlli üçün zəruri düzəliş vasitəsi kimi nəzərdən keçirə, siyasətlərini dəyişdirə və islahatların həyata keçirilməsi üçün administrasiya ilə işləyə bilər. Yaxud onlar əsas demokratik məsuliyyətə cavab olaraq "faşizm" deyə qışqıra və daha da əhəmiyyətsizliyə düçar ola bilərlər", - Vens fikirlərini yekunlaşdırıb.

Ukraynanın xarici işlər nazirinin müavini Sergey Kislitsa Türkiyənin İstanbul şəhərində keçirilən Rusiya ilə danışıqların təfərrüatlarını açıqlayıb.

"Report" xəbər verir ki, o, bunu "Biz Ukraynayıq" telekanalına müsahibəsində deyib.

Onun sözlərinə görə, Rusiya tərəfi atəşkəs məsələsini “qəti şəkildə qəbuledilməz” hesab edərək, bununla bağlı danışıqlar aparmaq istəməyib. Rəsmi həmçinin vurğulayıb ki, Rusiya nümayəndə heyəti ərazilərin qondarma DXR, LXR, Zaporijye və Xerson vilayətlərinə “verilməsini” tələb edib, sabah Moskvanın “altı və ya səkkiz” rayon tələb edəcəyi ilə hədələyib, Rusiya nümayəndə heyətinin rəhbəri Vladimir Medinski isə Ukraynadakı müharibəni “ruslarla bəzi fərqliliyi olan ruslar arasında müəyyən qarşıdurma” adlandırıb.

"Əslində Rusiya sizin bir millət olaraq varlığınızı inkar edir. Üzünüzə deyirlər: sən ukraynalı deyilsən, russan", - Kislitsya Medinskinin sözlərinə belə münasibət bildirib.

Xatırladaq ki, mayın 16-da İstanbulda Moskva və Kiyev nümayəndə heyətlərinin son üç ildə ilk ikitərəfli görüşü baş tutub. Danışıqların yekununa əsasən tərəflər “1000-ə 1000” formuluna əsasən məhbusların dəyişdirilməsi barədə razılığa gəliblər. Bundan əlavə, Rusiya və Ukrayna atəşkəslə bağlı fikirlərini ətraflı təqdim edəcəklərini və danışıqlar prosesinin davamını vəd ediblər.

Koreya hökuməti Çinin Sarı dənizdə iki ölkənin iqtisadi zonalarının kəsişdiyi ərazidən gəmilərin keçməsini qadağan etmək qərarından narahatdır.

“Report” xəbər verir ki, bu barədə Cənubi Koreya Xarici İşlər Nazirliyinə istinadən “Yonhap” agentliyi məlumat yayıb.

"Keçid tədbirləri zonası" daxilində gəmisiz ərazinin təyin edilməsi narahatlıq doğurur. Çünki bu, naviqasiya azadlığına lazımsız məhdudiyyətlər qoyur", - Seuldan bildirilib.

Cənubi Koreya diplomatik kanallar vasitəsilə öz mövqeyini Pekinə çatdırıb. Agentlik iddia edir ki, Koreya hakimiyyət orqanları bu cür hərəkətlərin beynəlxalq dəniz hüququ normalarını pozub-pozmadığını yoxlamaq niyyətindədir.

Qeyd edək ki, mayın 21-də “Newsweek” jurnalı Çinin gəmiçilik təhlükəsizliyi agentliyinin regional idarəsinin səbəb göstərmədən mayın 27-də yerli vaxtla saat 08:00-dan 20:00-a kimi iki ölkənin eksklüziv iqtisadi zonalarının kəsişdiyi xüsusi “keçid tədbirləri zonası”nda gəmilərin keçidinə qadağa qoyub.

İsrail Ordusu bütün quru və tank qoşunlarını Qəzza zolağına yerləşdirib.

“Report” xəbər verir ki, bu barədə “The Times of Israel” məlumat yayıb.

Hazırda anklavda Givati, Qolani, Kfir, Nahal briqadalarının bölmələri, paraşütçülər, komandolar, 7-ci, 188-ci və 401-ci tank qoşunları, həmçinin müəyyən sayda ehtiyatda olanlar var. Qeyd olunur ki, bu qüvvələr sektorda hərbi əməliyyatların daha da intensivləşdirilməsinə hazırlıq fonunda cəmləşib.

Bundan əvvəl İsrail ordusu Qəzzada “Gideonun arabaları” adlı yeni genişmiqyaslı quru əməliyyatı çərçivəsində beş briqadanın fəaliyyət göstərdiyini bildirmişdi. “The Times of Israel”in məlumatına görə, onların sayı on minlərlə əsgərdir.

Xatırladaq ki, mayın 18-də İsrail Ordusu "Gideonun cəng arabaları" genişmiqyaslı quru əməliyyatı çərçivəsində Qəzza zolağının şimal və cənub rayonlarında döyüş əməliyyatlarına başladığını elan edib. Həmin gün İsrail Baş naziri Benyamin Netanyahunun ofisi anklavda aclığı qabaqlamaq üçün Qəzza zolağı ərazisinə "baza səviyyədə" ərzağın gətirilməsinə icazə verəcəyini bildirib.