Yuxarı

​Səudiyyə Ərəbistanında qadınların səs verməsinə icazə verilib

Qadınlar həm də namizədliklərini irəli sürə biləcək

Bakı. 22 avqust. REPORT.AZ/ Səudiyyə Ərəbistanı tarixində ilk dəfə qadınlara bələdiyyə seçkilərində səs verməyə və namizədliklərini irəli sürməyə icazə verilib.

"Report" Səudiyyə Ərəbistanı İnformasiya Agentliyinə (SPA) istinadən xəbər verir ki, bu il dekabrın 12-də krallıqda bələdiyyə seçkiləri keçiriləcək. Ölkədəki 1263 seçki məntəqəsindən 163-də qadınların da adları namizədlər siyahısına daxil ediləcək. 70 qadın bələdiyyə seçkilərində namizəd kimi iştirak etmək niyyətindədir. Zərif cinsin 80-ə yaxın nümayəndəsi isə seçkiqabağı kampaniyanın təşkilatçısı kimi qeydiyyata alınmaq istəyir.

Seçicilərin qeydiyyatı avqustun 22-də başlayır və sentyabrın 14-dək davam edəcək. Avqustun 30-dan sentyabrın 17-dək namizədlərin qeydiyyat müddətidir. Noyabrın 29-da namizədlərin yekun siyahısı elan olunacaq.

Qeyd edək ki, krallıqda bələdiyyə seçkiləri 2005-ci ildən keçirilir. 2005-2011-ci illərdə keçirilən bu kampaniyada qadınlar nə seçici, nə də namizəd kimi iştirak etməyib.

Hələ 2011-ci il sentyabrın 25-də Səudiyyə Ərəbistanının mərhum kralı Abdulah bin Əbdüləziz qadınların bələdiyyə seçkilərində seçici və namizəd olaraq iştirak etməsi haqda fərman vermişdi. Ancaq bu sənədi indiki kralı Salman ibn Əbdüləziz imzalayıb.  

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi