Hondurasda yol qəzasında yeddi nəfər ölüb

Hondurasın paytaxtı Tequsiqalpada baş verən ağır yol qəzasında yeddi nəfər ölüb, azı 10 nəfər xəsarət alıb.

"Report" xəbər verir ki, bu barədə "La Prensa" qəzeti xilasetmə xidmətlərinə istinadən məlumat yayıb.

Məlumata görə, Vilya-Nueva rayonunda ağır tonnajlı yük maşını ehtimal ki, əyləc nasazlığı səbəbindən idarəetmədən çıxaraq yüksək sürətlə bir neçə avtomobilə, müəssisəyə və piyadaya çırpılıb.

Ölənlər arasında yük maşınının sürücüsü Osman Quterres Espinal da var. Yaralılar paytaxtdakı xəstəxanalara aparılıb, onların vəziyyəti sabitdir və həyatları üçün təhlükə yoxdur.

Hadisə yerində xilasedicilər və polis işləyir, qəza ilə bağlı araşdırma aparılır.