Burkina-Fasoda silahlılar 40 dinc sakini öldürüb

BMT-nin İnsan Haqları üzrə Ali Komissarlığının Ofisi Burkina-Fasonun Cibo şəhərində 40 mülki vətəndaşı öldürən və 42-dən çox insanı yaralayan “Camaat Nüsrət əl-İslam vəl Müslimin” yaraqlılarını mühakimə etməyə çağırıb.

“Report”un məlumatına görə, komissarlığın sözçüsü Seyf Maqanqo Cenevrədə bildirib ki, hərbi əməliyyatlarda iştirak etməyən mülki şəxslərə qəsdən hücumlar müharibə cinayətidir.

Onun sözlərinə görə, yaraqlılar məcburi köçkünlər üçün nəzərdə tutulan üç düşərgəni və 20 dükanı yandırıblar:

“Mülki şəxslərə qarşı hücumlar dayandırılmalıdır və səlahiyyətlilər tərəfindən hərtərəfli, qərəzsiz və müstəqil araşdırma aparıldıqdan sonra cavabdehlər məsuliyyətə cəlb edilməlidir. Biz bütün tərəfləri beynəlxalq humanitar hüquq çərçivəsində götürdükləri öhdəliklərə əməl etməyə, o cümlədən mülki şəxslərə və mülki obyektlərə hücumlardan çəkinməyə çağırırıq”.