Böyük Britaniyada məktəb avtobusu aşıb: bir uşaq ölüb, yaralılar var

Böyük Britaniyada məktəb avtobusunun aşması nəticəsində bir uşaq ölüb, iki nəfər müxtəlif dərəcəli xəsarətlər alıb.

"Report" TASS-a istinadən xəbər verir ki, sözügedən avtobusla məktəblilər ekskursiyadan qayıdırmış. Həmin vaxt avtobus trasdan çıxaraq aşıb.

Hadisə Somerset qraflığının ərazisində baş verib. Avtobusda ümumilikdə 70-dək məktəbli olub.

Ciddi xəsarət alan iki məktəbli dərhal tibbi helikopterlə xəstəxanaya çatdırılıb. Ümumilikdə isə 21 məktəbliyə tibbi müdaxilə lazım olub. Bəzilərinin xəsarətləri ciddidir.

"Daily Telegraph" yazır ki, Meynhed orta məktəbində oxuyan uşaqlar 9-14 yaşlı məktəblilərdir.

Artıq Böyük Britaniyanın baş naziri Kir Starmer və Nazirlər Kabinetinin bəzi üzvləri baş verən hadisə ilə bağlı başsağlığı ünvanlayıb.