Almaniyada antisemit hadisələrin sayı dörd dəfə artıb

Almaniyada Qəzza zolağındakı münaqişə fonunda antisemit hadisələrin sayı dörd dəfə artıb.

“Report” xəbər verir ki, bu barədə Antisemitizm üzrə Məlumatların Qeydiyyatı və Nəzərdən keçirilməsi Federal Birliyinin hesabatında yer alıb.

Oktyabrın 7-dən noyabrın 9-dək Almaniyada 994 təsdiqlənmiş antisemit insident baş verib.

“Müharibə başlayandan sonra ilk 34 gün ərzində Almaniyada gündə 29 antisemit hadisəsi baş verib. Müqayisə üçün qeyd edək ki, 2022-ci ildə gündə orta hesabla yeddi hadisə baş verib”, - hesabatda vurğulanıb.

Beləliklə, hadisələrin sayı 2022-ci ilin orta göstəricisi ilə müqayisədə 320% artıb.