ABŞ-ın Missuri ştatının Sent Luis şəhərinin şimalında baş verən atışma nəticəsində 3 nəfər ölüb, 1 nəfər yaralanıb.
“Report” “RİA Novosti”yə istinadən xəbər verir ki, bu barədə yerli “St. Louis Post-Dispatch” qəzeti polisə istinadən məlumat yayıb.
Polis nümayəndəsi Mişel Uidinqin verdiyi məlumata görə, üç nəfər hadisə yerində ölüb, daha bir şəxs isə ayağından güllə yarası alıb.
Qəzet qeyd edir ki, atışmaya nəyin səbəb ola biləcəyi hələlik məlum deyil, lakin səlahiyyətlilər hadisənin iki qruplaşma arasındakı mübahisə nəticəsində baş verdiyini ehtimal edirlər.
Polis hadisə yerindən silahlar aşkar edib.