Parisdə ulu öndər Heydər Əliyevin anım mərasimi keçirilib

Fransanın paytaxtı Parisdə müasir müstəqil Azərbaycan dövlətinin memarı və qurucusu, dünyaşöhrətli siyasi xadim, xalqımızın ümummilli lideri Heydər Əliyevin vəfatının 19-cu ildönümü ilə bağlı anım mərasimləri keçirilib.

“Report”un yerli bürosu xəbər verir ki, tədbirdə Azərbaycanın Fransadakı səfiri Leyla Abdullayeva, UNESCO yanında Daimi nümayəndəsi Elman Abdullayev, Milli Məclisin Beynəlxalq münasibətlər və parlamentlərarası əlaqələr komitəsinin sədri, Azərbaycanın Avropa Şurası Parlament Assambleyasındakı nümayəndə heyətinin rəhbəri Səməd Seyidov, Fransanın Azərbaycanda ilk səfiri Jan Perən, Azərbaycan diasporunun üzvləri və digər şəxslər iştirak ediblər.

Tədbirlər iştirakçıları ümummilli liderin xatirəsini dərin ehtiramla yad ediblər.

Ulu öndərin əziz xatirəsi bir dəqiqəlik sükutla yad edilib və fəaliyyətinə həsr edilən video nümayiş etdirilib.

Bildirilib ki, ümummilli lider Heydər Əliyevin ikinci dəfə, ölkəmiz üçün həlledici bir məqamda hakimiyyətə gəlişi Azərbaycanın müasir tarixinin şərəfli səhifələrinin yazılmasına və dövlətimizin müstəqilliyinin əbədiliyinə hərtərəfli zəmin yaradıb.

Çıxışlarda Azərbaycanın hərtərəfli tərəqqisi yolunda böyük tarixi xidmətlər göstərən, dövlət müstəqilliyinin və təhlükəsizliyinin qorunmasına əvəzsiz töhfələr verən Heydər Əliyevin Vətənə sədaqət, xalqa fədakarlıqla xidmət nümunələrindən söz açılıb.

Bildirilib ki, Azərbaycanda ictimai-siyasi sabitliyi bərpa edən, ölkəni durğunluq vəziyyətindən çıxararaq güclü iqtisadiyyata sahib bir dövlətə çevirən Heydər Əliyevin əziz xatirəsi Azərbaycan xalqının qəlbində daim yaşayacaq.