QH təmsilçisi: Müşahidə etdiyim bütün məntəqələrdə seçkilər dinc şəkildə keçirilib

Müşahidə etdiyim bütün məntəqələrdə seçkilər dinc şəkildə keçirilib.

Bunu "Report"a açıqlamasında Qoşulmama Hərəkatı Gənclər Təşkilatının (QHGT) müşahidə missiyasının üzvü, Mozambikdən olan müşahidəçi Machava Benedito Xadreque 7 saylı Səbail seçki dairəsinin 4 saylı seçki məntəqəsində deyib.

"Mən buraya QHGT tərəfindən dəvət olunmuşdum və müşahidələrim onu deməyə əsas verir ki, Azərbaycanda növbədənkənar parlament seçkiləri çox yaxşı keçir. Mən seçki prosesi üçün ikinci dəfədir Azərbaycana gəlirəm. Bundan əvvəl prezident seçkilərində müşahidəçi idim, hər iki seçkidə dinc proses müşahidə elədim", - qeyd edib.

M.B.Xadreque Bakıda xoş qarşılanmasından da söz açıb:

"Bir qonaq kimi məni çox yaxşı qarşıladılar, Azərbaycan xalqı çox mehribandır və qonaqsevən insanlardır. Ümumilikdə proseslə bağlı fikirlərim müsbətdir. Bizim müşahidəçi kimi görmək istədiklərimizlə xalqın etdikləri üst-üstə düşür. Mən İƏT-dən olan tərəfdaşlarımın müşahidə apardıqlarını gördüm və ümid edirəm ki, bizim rəyimiz eyni olacaq".