Prezidentin xüsusi nümayəndəsi Qubadlı ictimaiyyətinin nümayəndələri ilə görüşüb

Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Prezidentin xüsusi nümayəndəsi təyin edilmiş Vahid Hacıyev Qubadlı rayon ictimaiyyətinin nümayəndələri ilə görüşüb.

"Report" xəbər verir ki, görüş Qubadlı Rayon İcra Hakimiyyətində keçirilib.

Görüşdə Qubadlı Rayon İcra Hakimiyyətinin Başçısı Malik İsaqov, İcra Hakimiyyətinin əməkdaşları, Qubadlı rayon ziyalıları və geniş ictimaiyyət nümayəndələri iştirak ediblər.

Prezident, Ali Baş Komandan İlham Əliyevin rəhbərliyi ilə müzəffər Azərbaycan Ordusunun 44 günlük Vətən müharibəsindəki qazanılan Zəfərin tarixi əhəmiyyətindən söz açan Vahid Hacıyev, zəfərdən dərhal sonra işğaldan azad edilmiş ərazilərdə görülmüş irimiqyaslı bərpa-quruculuq işlərindən danışıb.

Prezidentin xüsusi nümayəndəsi Qubadlı rayonunda aparılacaq bərpa-quruculuq işləri, Qubadlı kəndlərinin yenidən qurulması və burada mövcud olmuş iqtisadiyyat sahələrinin dirçəldilməsi üçün görüləcək işlər haqqında Qubadlı rayon ictimaiyyətinin nümayəndələrinə ətraflı məlumat verib.

O, həmçinin, “Böyük Qayıdış”ın ilk qədəmlərinin qoyulduğu Zəngilan rayonu Ağalı kəndinə keçmiş məcburi köçkünlərin artıq köçürülməsindən və bu prosesin davalı olaraq bütün Şərqi Zəngəzurda, o cümlədən Qubadlı rayonunda həyata keçiriləcəyindən söz açıb.

Sonra xüsusi nümayəndəliyin əməkdaşları Qubadlı Rayon İcra Hakimiyyəti nəzdində yaradılmış zəngin tarixi və mədəni irsə sahib Qubadlı rayon muzeyi ilə tanış olublar.