Azərbaycan könüllüləri növbədənkənar prezident seçkilərini müşahidə edirlər

Azərbaycan könüllüləri bu gün keçirilən növbədənkənar prezident seçkilərində müşahidəçi olaraq fəaliyyət göstərirlər.

“Report” xəbər verir ki, onlar seçki prosesinə töhfə vermək məqsədilə seçki qanunvericiliyinə uyğun olaraq Azərbaycan Könüllü Təşkilatları İttifaqının təmsilçiləri qismində seçkiləri müşahidə edirlər.

Qeyd edək ki, könüllülər Bakı şəhəri və bölgələrdə, həmçinin Azərbaycanın işğaldan azad edilən ərazilərində növbədənkənar prezident seçkilərini müşahidə edirlər.

Xatırladaq ki, Azərbaycanda bu gün növbədənkənar prezident seçkiləri keçirilir. Seçkilərdə hakim Yeni Azərbaycan Partiyasının prezidentliyə namizədi İlham Əliyev, namizədliyi özü tərəfindən irəli sürülən Zahid Oruc, Milli Cəbhə Partiyasının prezidentliyə namizədi Razi Nurullayev, Böyük Quruluş Partiyasının prezidentliyə namizədi Fazil Mustafa, Böyük Azərbaycan Partiyasının prezidentliyə namizədi Elşad Musayev, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev və namizədliyi özü tərəfindən irəli sürülən Fuad Əliyev mübarizə aparır.