Hacıqabulda əmək yarmarkası keçirilib

Şirvan-Salyan Regional Məşğulluq filialının dəstəyi ilə Hacıqabul şəhərində Heydər Əliyev Mərkəzində əmək yarmarkası keçirilib.

"Report"un Aran bürosunun məlumatına görə, əmək yarmarkası Şirvan-Salyan Regional Məşğulluq filialına daxil olan Hacıqabul rayonunda yerləşən 11 işəgötürənlə təşkil edilib.

İşəgötürənlər tərəfindən müvafiq vakansiyalara dair tələblər barədə ətraflı məlumat verilib, işsiz və işaxtaran şəxslərə 107 boş iş yerləri (əməkhaqqı 350-1000 manat aralığında) təqdim olunub.

Filial tərəfindən təqdim olunmuş vakansiyalara dair tələblər təhlil olunaraq işsiz və işaxtaran şəxs kimi qeydiyyatda olan 200 vətəndaşla iş aparılıb, uyğun namizədlər tədbirə cəlb edilib.

İşəgötürən tərəfindən vakansiyalara müraciət edən şəxslərin CV-ləri qəbul edilərək nəzərdən keçirilib, uyğun namizədlər növbəti mərhələyə dəvət olunublar.