“Baku Steel Company” 29-cu Beynəlxalq Xəzər Neft və Qaz Sərgisində iştirak edir

Qafqazın ən böyük və müasir metallurgiya şirkəti olan “Baku Steel Company” QSC (BSC) 4-6 iyun 2024-cü il tarixlərində Bakı Enerji Həftəsi çərçivəsində təşkil olunan 29-cu Beynəlxalq Xəzər Neft və Qaz Sərgisində gümüş sponsor qismində iştirak edir.

Hər il Bakıda keçirilən və regionun enerji sahəsində ən mühüm tədbiri sayılan Bakı Enerji Həftəsinə bu il dünyanın 37 ölkəsindən 300-dək şirkət gəlib. Tədbirdə Azərbaycanla yanaşı, ABŞ, Almaniya, Avstraliya, Avstriya, Belarus, Belçika, Bəhreyn, Birləşmiş Ərəb Əmirlikləri, Bolqarıstan, Böyük Britaniya, Çexiya, Çin, Əlcəzair, Finlandiya, Fransa, Gürcüstan, Hindistan, İraq, İsrail, İsveç, İtaliya, Latviya, Qazaxıstan, Qətər, Macarıstan, Monako, Niderland, Norveç, Özbəkistan, Rumıniya, Rusiya Federasiyası, Səudiyyə Ərəbistanı, Sloveniya, Türkiyə, Ukrayna və Yaponiya təmsil olunur. Bu ölkələr arasında İsveç, Hindistan və Sloveniyadan olan şirkətlər ilk dəfədir ki, tədbirə qatılırlar.

Sərginin daimi iştirakçılarından biri, bu il yenə də tədbirin gümüş sponsoru olan BSC, Bakı Ekspo Mərkəzinin 1-ci zalında 1C314 ünvanlı stendində öz yüksək keyfiyyətli və beynəlxalq sertifikatlı məhsullarını sərgiləyir.

Tədbirin ziyarətçiləri və iştirakçıları arasında böyük marağa səbəb olan stenddə BSC-nin geniş çeşiddə polad məhsulları, xüsusilə neft-qaz istismarı layihələrində istifadə olunan tikişsiz boruları nümayiş edilir.

Şirkətin tikişsiz boruları 114-219 mm diametrli olmaqla BSC-nin Azərboru İstehsalat sahəsindəki avadanlıqlar vasitəsilə istehsal olunur və böyük tələbatla ixrac edilən məhsulların sırasında yer alır.

Həmçinin, BSC bu il ilk dəfədir ki, öz stendində ferroərinti məhsulunu da təqdim edir. Sumqayıt Kimya Sənaye Parkında yerləşən BSC-nin Ferroərintilər istehsalat sahəsində hazırlanan yüksək keyfiyyətli və fərqli fraksiyalarda olan (FeSi 65% - FeSi 75%, fraksiya 10-50 mm) ferrosilisium (FeSi) müxtəlif növ poladların və çuqunların legirlənməsi və oksidləşməsi üçün istifadə olunur.