Azərbaycanda ticarət və informasiya portalı istifadəyə veriləcək

Bu ilin sonuna qədər Azərbaycanda ticarət və informasiya portalı - madeinazerbaijan.gov.az istifadəyə veriləcək.

"Report" xəbər verir ki, bunu Beynəlxalq Ticarət Mərkəzinin İxracın və İnvestisiyaların Təşviqi Agentliyi (AZPROMO) ilə birgə keçirdiyi, “Ticarət zamanı qeyri-tarif maneələri və xidmət ticarətinin qaydaları ilə bağlı maraqlı tərəflərlə məsləhətləşmələr” mövzusunda tədbirdə AZPROMO-nun icraçı direktorun müavini Tural Hacılı bildirib.

Onun sözlərinə görə, elektron platforma vasitəsilə ixracatçılara daha yüksək səviyyəli və keyfiyyətli xidmətlər göstəriləcək.

"Bu portalda zəruri informasiyalar yerləşdiriləcək. İxracatçılar üçün məlumatlar əlçatan olacaq", - deyə o qeyd edib.

"Ötən il Azərbaycanın qeyri-neft ixracının dəyərində rekord qeydə alınıb. Azərbaycandan 3,348 milyard ABŞ dolları dəyərində qeyri-neft məhsulları ixrac olunub. Bu 2022-ci ilə nisbətən 9,8 % çoxdur. Təkcə ötən ilin dekabrında ölkədən ixrac olunan qeyri-neft məhsullarının dəyəri isə 314,2 milyon ABŞ dolları təşkil edib ki, bu da illik müqayisədə 3,8 % çoxdur. Ötən ilin IV rübündə isə ölkədən 914,2 milyon ABŞ dolları dəyərində qeyri-neft məhsulları ixrac olunub, bu da əvvəlki ilin eyni rübü ilə müqayisədə 7,9% çoxdur", - deyə T.Hacılı əlavə edib.

Tədbirdə Avropa İttifaqının (Aİ) təşəbbüsü olan “EU4Business" və BMT tərəfindən icra edilən Şərq Tərəfdaşlığının Ticarətə Yardım Masası layihəsi çərçivəsində BTM tərəfindən Azərbaycanda ticarət zamanı qeyri-tarif maneələrinin müəyyən edilməsi məqsədilə aparılan biznes sorğunun nəticələri iştirakçılara təqdim olunub, müəyyən olunan maneələrin aradan qaldırılması üçün dəyirmi masa formatında interaktiv müzakirələr həyata keçirilib.

Qeyd edək ki, tədbir yanvar ayının 25-i "Azərbaycanda informasiya və texnologiya sektoru: problemlər və imkanlar” və "Azərbaycanda davamlı turizm sektorunun yaradılması” mövzularında baş tutacaq dəyirmi masalar ilə yekunlaşacaq.