Azərbaycan Hindistan və Banqladeşə mebel ixracını bərpa edib

Ötən il Azərbaycan 3,3 milyon ABŞ dolları dəyərində 25 626 ədəd mebel (ağacdan mətbəx, yataq və sair) ixrac edib.

“Report”un Dövlət Statistika Komitəsinin məlumatları əsasında apardığı hesablamalarına əsasən, bu, 2023-cü ilin göstəricisindən dəyər ifadəsində 7 %, kəmiyyət olaraq – 12 % çoxdur.

Hesabat dövründə Azərbaycan Polşaya 1,1 milyon ABŞ dolları dəyərində (bir il əvvəlki göstəricidən 3 dəfə çoxdur) 2 196 ədəd (+2,6 dəfə), Gürcüstana 874 min ABŞ dolları dəyərində (+46 %) 9 222 ədəd (+65 %), Amerika Birləşmiş Ştatlarına 513 min ABŞ dolları dəyərində (-20 %) 8 463 ədəd (-17 %), Rusiyaya 310 min ABŞ dolları dəyərində (+5,5 dəfə) 2 292 ədəd (+4 dəfə), Qazaxıstana 240 min ABŞ dolları dəyərində (-17 %) 866 ədəd (-51 %) mebel satıb.

Azərbaycan 6 il 8 ayın tamamında Banqladeşə (1,6 min ABŞ dolları dəyərində 3 ədəd) və 1 il 10 aylıq aradan sonra Hindistana (7,1 min ABŞ dolları dəyərində 22 ədəd) tədarükü bərpa edib.