Azərbaycan Gürcüstanla sərmayələrin təşviqini müzakirə edib

Azərbaycan Gürcüstanla sərmayələrin təşviqi və əməkdaşlığın perspektivləri barədə müzakirələr aparıb.

“Report” xəbər verir ki, bu barədə iqtisadiyyat naziri Mikayıl Cabbarov “X” sosial şəbəkəsindəki hesabında yazıb.

“Gürcüstana səfərim çərçivəsində bu ölkənin Baş nazirinin müavini, iqtisadiyyat və davamlı inkişaf naziri Levan Davitaşvili ilə ikitərəfli iqtisadi əlaqələrin inkişafı, ticarət dövriyyəsinin artımı, sərmayələrin təşviqi və əməkdaşlığın perspektivləri barədə fikirlərimizi bölüşdük”, - nazir qeyd edib.

***

İqtisadiyyat nazirliyinin bununla bağlı yaydığı məlumatda isə deyilir ki, görüşdə azərbaycanlı nazir Gürcüstanla iqtisadi əlaqələrin müsbət dinamikasını qeyd edib, qarşılıqlı faydalı imkanların dəyərləndirilməsi və reallaşdırılması üçün ticarət, investisiya, nəqliyyat-tranzit, enerji və digər sahələrdə potensialı diqqətə çatdırıb.

O, qeyd edib ki, Gürcüstan Azərbaycanın təşəbbüsü ilə reallaşdırılan enerji və nəqliyyat layihələrində fəal iştirak etməklə regional əməkdaşlığa töhfə verir. Bunun nəticəsidir ki, dövlətlərimiz bu gün Avropanın enerji təhlükəsizliyi üçün önəmli rol oynayan ölkələrdəndir.

Görüşdə Azərbaycan və Gürcüstanın yüksək tranzit potensialından daha yaxşı istifadə etmək məqsədi ilə beynəlxalq nəqliyyat dəhlizlərinin inkişafı üzrə əməkdaşlığın daha da möhkəmləndirilməsi imkanları vurğulanıb, bu xüsusda, Orta Dəhlizinin əhəmiyyəti qeyd olunub.

L.Davitaşvili hər iki ölkənin iştirakı ilə həyata keçirilən layihələrin regional inkişafa xidmət etdiyini vurğulayaraq, tərəfdaşlıq çərçivəsinin genişləndirilməsi üçün potensialı qeyd edib.

Tərəflər iqtisadi əlaqələrin şaxələndirilməsinə xidmət edən qarşılıqlı maraq doğuran məsələləri nəzərdən keçiriblər.