Azərbaycanda aqrar sığorta potensialının 90 %-dən istifadə olunmur

Azərbaycanda istehsal olunan kənd təsərrüfatı məhsullarının cəmi 10 %-i sığorta olunur.

“Report” xəbər verir ki, bunu Aqrar Sığorta Fondunun (ASF) İdarə Heyətinin sədri Fuad Sadıqov bu gün keçirdiyi brifinqdə bildirib.

“Bu da o deməkdir, ki, 90 %-lik istehsal həcmi sığortalanmır. Bununla belə, Azərbaycanda aqrar sığorta sistemi yeni olmasına baxmayaraq nəticələr hər il müsbətə doğru irəliləyir. Ötən il sığorta yığımlarımız 15 milyon manat olub, bu il bu rəqəmin 20 % artması gözlənilir. Artımı hər il müşahidə edəcəyik, - deyə sədr əlavə edib.

Bundan başqa, o, bildirib ki, Fondun zərər ödənişi 2021-ci ildə 2 milyon manat, 2022-ci ildə 3 milyon manat təşkil edib, 2023-cü ildə isə 5 milyon manat olacaq.