Azərbaycan “Dayanıqlı İnkişaf üçün Su: 2018-2028-ci illər” konfransında təmsil olunub

Son illər qlobal iqlim dəyişikliklərinin təsirindən su ehtiyatlarının azalması nəticəsində kənd təsərrüfatı təyinatlı torpaqların suvarılmasında çətinliklər yaranıb.

“Report”un Kənd Təsərrüfatı Nazirliyinə istinadən verdiyi məlumata görə, bunu nazir Məcnun Məmmədov Tacikistanın paytaxtı Düşənbə şəhərində keçirilən 2018-2028-ci illər üzrə “Davamlı İnkişaf üçün Su” Beynəlxalq Onillik Fəaliyyətə dair III Yüksək Səviyyəli Beynəlxalq Konfransda çıxışı zamanı bildirib.

Azərbaycanın su və torpaq ehtiyatları məhdud olan ölkələrdən olduğunu deyən nazir vurğulayıb ki, su ehtiyatlarından səmərəli istifadənin təmin edilməsi və su təsərrüfatının təkmilləşdirilməsini daim diqqət mərkəzində saxlanılır: “Azərbaycanda intensiv kənd təsərrüfatının formalaşmasına, o cümlədən müasir suvarma sistemlərinin tətbiqinə mühüm dövlət dəstəyi verilir”.

Nazir bildirib ki bu sahədə fəaliyyəti əlaqələndirmək məqsədilə Prezident İlham Əliyevin Sərəncamı ilə Komissiya yaradılıb: “Komissiya tərəfindən yeni çağırışlar nəzərə alınmaqla iqlim dəyişikliyinin su resurslarına təsirinin minimuma endirilməsi üçün mövcud su itkilərinin azaldılması, ölkədə su ehtiyatlarının artırılması, alternativ su ehtiyatlarının qiymətləndirilməsi və mümkün istifadəsi kimi 3 prioritet istiqamət müəyyən edilib”.

Tədbir iştirakçılarına Azərbaycanda sudan səmərəli istifadə ilə bağlı həyata keçirilən və planlaşdırılan tədbirlər barədə ətraflı məlumat verilib.

İqlim dəyişikliyinin təsirlərinin regional səviyyədə idarəetməni vacib etdiyini deyən nazir COP29 tədbirində su ehtiyatları sahəsində bütün təşəbbüslərin diqqət mərkəzində saxlanılacağını və bu istiqamətdə faydalı müzakirələrin aparılacağını vurğulayıb.

Tədbiri giriş sözü ilə açan Tacikistan prezidenti Emoməli Rəhmon bildirib ki, qlobal istiləşmə fonunda su ehtiyatlarından səmərəli istifadə mühüm çağırışlardan biri olaraq qalır. Son 5 ildə planetdə ən isti il və ayların müşahidə olunduğunu xatırladan Tacikistan prezidenti əlavə edib ki, bununla yanaşı hər il təbii fəlakətlərin ümumi sayında su ilə bağlı fövqəladə halların xüsusi çəkisi və onlardan dəymiş zərərin miqdarı da artır. Prezident Emoməli Rəhmon iqlim dəyişikliyinin su ehtiyatlarına mənfi təsirlərinin minimuma endirilməsi məqsədilə effektiv və təcili tədbirlərin görülməsi üçün müzakirə və qlobal əməkdaşlığın mühüm olduğunu diqqətə çatdırıb. Tacikistanın dövlət başçısı bu ilin noyabrında Azərbaycanda keçiriləcək Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində təşkil olunacaq müzakirələrdə su resurslarından rasional və dayanıqlı istifadə etməklə bağlı mühüm nəticələrin əldə ediləcəyinə əminliyini ifadə edib.

Tədbirdə su ehtiyatlarından səmərəli istifadə, su itkilərinin qarşısının alınması, təbii ehtiyatların davamlı istifadəsində innovasiya və rəqəmsallaşmanın rolu, bu istiqamətdə gələcək əməkdaşlıq istiqamətləri, davamlı inkişaf üçün su üzrə qlobal, regional və ölkələr səviyyəsində görüləcək işlər müzakirə olunub. Mütəxəssislər qlobal iqlim dəyişikliklərinin su mənbələrinə təsirinin idarə edilməsi üçün su ehtiyatlarının sektorlar üzrə bölüşdürülməsi və dəqiq uçotunun aparılması, müasir suvarma sistemlərinin tətbiqinin genişləndirilməsinin aktual olduğunu vurğulayıblar.

Qeyd edək ki, Düşənbə şəhərində keçirilən 2018-2028-ci illər üzrə “Davamlı İnkişaf üçün Su” Beynəlxalq Onillik Fəaliyyətə dair III Yüksək Səviyyəli Beynəlxalq Konfransında Azərbaycanı kənd təsərrüfatı naziri Məcnun Məmmədovun rəhbərlik etdiyi nümayəndə heyəti iştirak edir. Nümayəndə heyətinin tərkibinə Ekologiya və Təbii Sərvətlər Nazirliyi, Dövlət Su ehtiyatları Agentliyinin məsul şəxsləri daxildir.