Azərbaycanda həyata keçirilən irimiqyaslı iqtisadi islahatlar və müasir mərhələdə aparılan dövlət siyasəti qlobal iqlim gündəliyi və "yaşıl iqtisadiyyat" kursu ilə sıx şəkildə əlaqəlidir.
"Report" xəbər verir ki, bunu Azərbaycanın ekologiya və təbii sərvətlər nazirinin birinci müavini Ağakərim Səmədzadə İslam İnkişaf Bankı (IsDB) Qrupunun Bakıda keçirilən illik toplantılarında çıxışı zamanı deyib.
O qeyd edib ki, respublikanın vəzifələri strateji ölçüyə malikdir - iqtisadi inkişaf müstəsna olaraq ətraf mühitin mühafizəsi ilə harmoniya şəraitində həyata keçirilməlidir.
Nazir müavini vurğulayıb ki, "Azərbaycan 2030: sosial-iqtisadi inkişafa dair Milli Prioritetlər"ə əsasən, təmiz və sağlam ekologiya ölkənin fundamental hədəflərindən biri kimi müəyyən edilib: "Hazırda Azərbaycanın təbiətin mühafizəsinə dair apardığı siyasət energetika, nəqliyyat, şəhərsalma və investisiya fəaliyyəti kimi istiqamətlərə tam inteqrasiya edilib.
Bu yanaşmanın əyani təcəssümü "yaşıl enerji" zonası statusu almış Qarabağ və Şərqi Zəngəzurun işğaldan azad edilmiş əraziləridir. "Böyük Qayıdış" Dövlət Proqramı çərçivəsində burada enerji səmərəliliyi, təbiətdən səmərəli istifadə və "ağıllı şəhər", "ağıllı kənd" kimi qabaqcıl konsepsiyaların tətbiqi prinsiplərinə əsaslanan, miqyasına görə misilsiz bərpa prosesi həyata keçirilir".
O həmçinin əlavə edib ki, bu yaxınlarda COP29 iqlim sammitinin, "UN-Habitat"ın iştirakı ilə Ümumdünya Şəhərsalma Forumunun 13-cü sessiyasının (WUF13) uğurla keçirilməsi, habelə BMT-nin Ətraf Mühit Proqramı (UNEP) ilə əməkdaşlıq çərçivəsində Bakıda Ümumdünya Ətraf Mühit Gününün təşkili Azərbaycanın ekoloji nailiyyətlərinin beynəlxalq səviyyədə tanınmasında mühüm mərhələlər olub.