Xarkovda Ümummilli Lider Heydər Əliyevin xatirəsi anılıb

Ukraynanın Xarkov şəhərində Azərbaycan xalqının Ümummilli Lideri Heydər Əliyevin anım gününə həsr olunmuş tədbir keçirilib.

“Report”un Şərqi Avropa bürosunun məlumatına görə, tədbir Xarkov Milli Şəhər Təsərrüfatı Universitetində fəxri konsulluğun təşəbbüsü ilə təşkil olunub.

Azərbaycanın Ukraynadakı səfiri Seymur Mərdəliyev tədbirdə giriş nitqi ilə çıxış edib. O, Ulu Öndərin həyat və fəaliyyəti, Ukrayna ilə diplomatik əlaqələrin möhkəmləndirilməsində əhəmiyyətli töhfələri və dünya siyasətinə təsiri barədə danışıb.

Tədbirdə, həmçinin Xarkov vilayəti Fəxri vətəndaşlar Şurasının sədri Nikolay Titov, Ukrayna Mühəndislik Akademiyasının prezidenti Anatoli Vasilyev, fəxri konsul Əfqan Salmanov və digər qonaqlar çıxış ediblər.

Görüş Ümummilli Liderin həyat yolundan bəhs edən sənədli filmin nümayişi ilə başa çatıb.

Tədbir çərçivəsində Heydər Əliyevə həsr olunmuş fotosərgi də təşkil edilib.