Moskva. 5 dekabr. REPORT.AZ/ "Xəzər beşliyi çərçivəsində dialoqun inkişafından məmnunuq".
"Report"un Rusiya bürosunun məlumatına görə, bunu Rusiyanın xarici işlər naziri Sergey Lavrov Moskvada Xəzəryanı ölkələrin XİN başçılarının 7-ci iclasını açarkən deyib.
"Xəzər dənizinin hüquqi statusu haqqında Konvensiyanın işlənib hazırlanması üzrə ekspertlər səviyyəsində məsələnin necə irəlilədiyini görmək istərdik. Biz danışıqların nəticələrinin Qazaxıstanda keçiriləcək V Xəzər sammitində əks olunacağına ümid edirik. Xəzər beşliyi əməkdaşlığın daha yüksək səviyyəsinə yüksəlməyə imkan verən etibarlı hüquqi əsas əldə edəcək", - S.Lavrov bildirib.
"Biz müdafiə, hüquq-mühafizə orqanları, xilasetmə xidmətləri xətti üzrə dialoqa böyük əhəmiyyət veririk, təbiəti mühafizə fəaliyyətinin səmərəliliyinin artırılmasına ümid edirik", - Rusiya XİN başçısı vurğulayıb.