Şamil Ayrım: "Azərbaycan Prezidenti dünyaya ciddi bir mesaj verdi"

"Prezident İlham Əliyev Yunanıstanın Azərbaycana yeni təyin olunmuş fövqəladə və səlahiyyətli səfirinin etimadnaməsini qəbul edərkən sözün həqiqi mənasına dünyaya ciddi bir mesaj verdi".

Bunu "Report"un yerli bürosuna açıqlamasında Türkiyə-Azərbaycan Parlamentlərarası Dostluq Qrupunun rəhbəri, millət vəkili Şamil Ayrım deyib.

Onun sözlərinə görə, son günlər Türkiyənin Şərqi Aralıq dənizində neft və təbii qaz axtarışları aparmasına mane olmağa çalışırlar: Bu prosesə Avropanın bir qrup ölkəsinin dəstəyinə arxalanan Yunanıstan rəhbərlik edir. Türkiyə bu çirkin kampaniyanın qarşısını almaq üçün beynəlxalq miqyasda mübarizə aparır. Azərbaycan Prezidentinin yunan səfirlə görüşdə “Biz Türkiyəni tərəddüdsüz dəstəkləyirik” ifadəsi həqiqətən Türkiyəyə çox əhəmiyyətli dəstək idi. İlham Əliyev “Türkiyənin sadəcə dostumuz, ortağımız deyil, bizim üçün qardaş ölkə olduğu sirr deyil” dedi. Bununla da Azərbaycanın mövqeyini açıq şəkildə ortaya qoydu. Bütün dünya Azərbaycanın açıq və qərarlı davranışını gördü. Dövlət başçısının bu mövqeyi Türkiyənin Aralıq dənizindəki yeri və mövqeyi üçün ciddi bir dəstək qaynağı oldu. Mən Azərbaycan hökumətinə, Prezident İlham Əliyevə və Azərbaycan xalqına bu mərd davranışına görə təşəkkür edirəm. Yaşasın Azərbaycan dostluğu və qardaşlığı!"

Vüsalə Abbasova