Şalend Sinqh: Şəhərimizin hər yeni rayonunda ərazinin 5 %-i idman və istirahət üçün ayrılır

Lautoka (Fici) rəhbərliyi şəhərin idman infrastrukturunun inkişafına kompleks yanaşma tətbiq edir.

"Report" xəbər verir ki, bu barədə Lautoka Şəhər Şurasının xidmət rəhbəri Şalend Sinqh (Shalend Singh) Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən panel müzakirəsi zamanı bildirib.

Sinqhin sözlərinə görə, Lautokada bu ilin sonuna qədər 15 milyon dollar dəyərində olan olimpiya hovuzunun istifadəyə verilməsi planlaşdırılır. "Bu obyekt yalnız yarışların keçirilməsi üçün deyil, həm də sakinlərin üzgüçülüklə məşğul ola bilməsi və sağlamlıqlarını möhkəmləndirməsi üçün yaradılır", - o qeyd edib.

O vurğulayıb ki, idman infrastrukturunun inkişafı şəhərsalma normaları səviyyəsində də ciddi şəkildə təsbit edilib. "Şəhərsalma qaydalarına əsasən, hər bir yeni rayonda ərazinin ən azı 5%-i rekreasiya və idman məkanları üçün ayrılmalıdır. Biz qürurla deyə bilərik ki, çoxfunksiyalı idman meydançası tikmişik, kiçik bir şəhər hüdudlarında 11 oyun meydançası, həmçinin 111 açıq ictimai məkan yaratmışıq", - Sinqh bildirib.

Spiker həmçinin bildirib ki, şəhər Lautokanın mərkəzi hissəsində müasir işıqlandırma və təhlükəsizlik sistemləri ilə təchiz olunmuş, 1,7 kilometr uzunluğunda abadlaşdırılmış piyada zonasının yaradılmasına investisiya yatırıb.

Bundan əlavə, onun sözlərinə görə, bələdiyyə orqanları KFCCS təşkilatı ilə şəhər ərazilərindən birində yüksək texnologiyalı idman zalının tikintisi barədə saziş imzalayıblar. "Təşkilat ondan gündə dörd saat öz ehtiyacları üçün istifadə edəcək, qalan vaxtlarda isə zal şəhər sakinləri üçün tamamilə açıq olacaq", - şəhər şurasının nümayəndəsi vurğulayıb.