Yuxarı

İlham Əliyev Qarabağ üzrə danışıqları davam etdirməyə hazır olduğunu bildirib

​Prezident Vyanada ABŞ-ın dövlət katibi Con Kerri ilə görüşüb

Bakı. 16 may. REPORT.AZ/ Azərbaycan prezidenti İlham Əliyev mayın 16-da Avstriyaya işgüzar səfəri çərçivəsində ABŞ-ın dövlət katibi Con Kerri ilə görüşüb.

"Report" xəbər verir ki, görüşdə ABŞ-ın dövlət katibi Con Kerri ATƏT-in Minsk qrupunun həmsədr ölkələrinin son dövrlər cəbhə xəttində baş verən hadisələrdən narahatlığını ifadə edib.

Bu səbəbdən də həmsədr dövlətlərin Birləşmiş Ştatların təşəbbüsü ilə Azərbaycan və Ermənistan prezidentləri arasında görüşün keçirilməsi qənaətinə gəldiklərini vurğulayan Con Kerri bu görüşdə bir sıra məsələlərlə bağlı müəyyən razılığın əldə olunmasının vacibliyinə toxunub.

ABŞ-ın dövlət katibi tərəflərin danışıqlar masası arxasına qayıtmalarını, qarşılıqlı etimad tədbirlərinin və anlaşmanın gücləndirilməsini istədiklərini bildirib. O qeyd edib ki, bu yolla danışıqlar prosesinə konstruktiv xarakter verilməli və danışıqlar davam etdirilməlidir.

Azərbaycan prezidenti İlham Əliyev bu görüşün təşkilinə görə ABŞ-ın dövlət katibinə təşəkkürünü bildirib. Dövlət başçısı bu məsələlər ətrafında danışıqların davam etdirilməsinə hazır olduğunu vurğulayıb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi