Peter Mixalko: "Aİ Azərbaycanda mina probleminin aradan qaldırılmasında maraqlıdır"

Avropa İttifaqının (Aİ) Azərbaycandakı səfiri Peter Mixalko Aİ-nin Azərbaycanda mina probleminin aradan qaldırılmasında maraqlı olduğunu bildirib.

“Report”un xəbərinə görə, səfir bunu dekabrın 4-də Bakıda keçirilən "Cənubi Qafqazda mina qurbanları ilə həmrəylik: Cənubi Qafqazda minaların və onların nəticələrinin ləğvi strategiyasının mühüm sütunu” mövzusunda tədbirdə çıxışı zamanı deyib.

O qeyd edib ki, Azərbaycan bu gün Cənubi Qafqazda mina problemindən ən çox əziyyət çəkən ölkədir.

“Biz çalışırıq ki, Azərbaycana əlimizdən gələn qədər kömək edək ki, bu problemi həll edə bilsin. Mina problemi siyasi məsələ deyil, humanitar məsələdir. Avropa İttifaqı Azərbaycanda mina probleminin aradan qaldırılmasında maraqlıdır. Lakin bu, çox uzun bir prosesdir”, - səfir deyib.

Onun sözlərinə görə, Aİ bu sahədə Azərbaycana müharibənin bitməsinin ilk günlərdən öz dəstəyini göstərir.

“Hazırda həmin ərazilərə vətəndaşlar qayıdır və onlar son dərəcə diqqətli olmalıdırlar ki, mina qurbanına çevrilməsinlər. Avropa İttifaqı son 3 ildə minalarla mübarizə sahəsinə 8 milyon avrodan çox vəsait ayırıb və bu məsələdə Azərbaycana dəstəyimiz davam edəcək”, - P.Mixalko bildirib.