Mübariz Qurbanlı: "Səudiyyə Ərəbistanı Azərbaycana 368 milyon dollar investisiya qoyub"

Bakı. 24 sentyabr. REPORT.AZ/ "Səudiyyə Ərəbistanının dövlət və özəl şirkətləri indiyədək Azərbaycan iqtisadiyyatına 368 milyon ABŞ dolları həcmində investisiya qoyublar".

“Report” xəbər verir ki, bunu Səudiyyə Ərəbistanının Milli Günü münasibətilə Bakıda təşkil olunmuş rəsmi qəbulda Dini Qurumlarla İş üzrə Dövlət Komitəsinin sədri Mübariz Qurbanlı bildirib.

“Azərbaycan Səudiyyə Ərəbistanı ilə enerji, infrastruktur, tikinti, kənd təsərrüfatı, turizm kimi sahələrdə əməkdaşlığa xüsusi önəm verir”, - Dövlət Komitəsinin sədri vurğulayıb.

Digər tərəfdən, Səudiyyə Ərəbistanının Azərbaycandakı müvəqqəti işlər vəkili Məmduh əl-Cəbru da Azərbaycanla münasibətlərə böyük əhəmiyyət verdiklərini diqqətə çatdırıb: “Azərbaycanla münasibətlər bizim xarici siyasətimizin öncül istiqamətlərindən biridir. Qarşılıqlı etimada söykənən münasibətlərimiz yüksək və ali səviyyədəki mütəmadi görüşlərlə daha da möhkəmlənir, nəticədə əməkdaşlığımız üçün mühüm sənədlər imzalanır”.