Meksikada 20 Yanvar faciəsi qurbanlarının xatirəsi anılıb

20 Yanvar faciəsinin 32-ci ildönümü ilə əlaqədar Meksikadakı Səfirliyimizdə anım mərasimi keçirilib.

Azərbaycanın Meksikadakı səfirliyindən “Report”a verilən məlumata görə, Meksikada yaşayan soydaşlarımız, Azərbaycanın meksikalı dostları və Meksika Konqresinin üzvü, deputat Navor Roxasın iştirakı ilə baş tutmuş tədbirdə ilk olaraq, faciə qurbanlarının xatirəsi bir dəqiqəlik sükutla yad edilib.

Sonra səfir Məmməd Talıbov qonaqlara Azərbaycan xalqının azadlıq uğrunda mübarizəsi, bu yolda məruz qaldığı 20 Yanvar qətliamı və bu faciənin Azərbaycan tarixinin ən ağrılı, eyni zamanda ən şanlı səhifələrindən biri olmasından bəhs edib.

Ümummilli lider Heydər Əliyevin dövrünün ağır şərtlərinə baxmayaraq, bu cinayəti kəskin şəkildə pisləyən, xalqımıza qarşı törədilmiş qırğına siyasi qiymət verilməsi və günahkarların cəzalandırılmasını tələb edən ilk dövlət xadimi olduğunu deyən M.Talıbov, bu cinayətin AR Milli Məclisinin 1994-cü ilin fevralında keçirilən xüsusi sessiyasında hərbi təcavüz və cinayət kimi qiymətləndirildiyini bildirib.

Sonra M.Talıbov Müzəffər Ali Baş Komandanın rəhbərliyi altında rəşadətli Azərbaycan Ordusunun 44 günlük Vətən müharibəsi nəticəsində ölkəmizin ərazi bütövlüyünü təmin etdiyini və Azərbaycanın müstəqilliyi, habelə suverenliyi və ərazi bütövlüyü uğrunda canından keçmiş bütün şəhidlərimizin əziz xatirəsinin xalqımızın yaddaşında əbədi yaşayacağını söyləyib.

Tədbirdə iştirak edən deputat Navor Roxas Azərbaycan xalqına səmimi başsağlığı diləklərini ifadə edib.

Mərasim zamanı iştirakçılara 20 Yanvar faciəsinin xronikası və xalqımızın azadlıq uğrunda sarsılmaz mübarizəsini əks etdirən videoçarx nümayiş olunub.