Yuxarı
    Bağlamaq

    İlham Əliyev: "Azərbaycan-Pakistan strateji tərəfdaşlığının inkişafı yolunda səylərimizi davam etdirəcəyik"

    Bu barədə prezidentin pakistanlı həmkarına təbrik məktubunda deyilir

    Bakı. 22 mart. REPORT.AZ/ Azərbaycan Prezidenti İlham Əliyev Pakistan Günü münasibətilə həmkarı Məmnun Hüseynə təbrik məktubu ünvanlayıb.

    "Report" xəbər verir ki, dövlət başçısı məktubunda Pakistan liderinə və xalqına əmin-amanlıq və firavanlıq arzulayıb.

    "Hörmətli cənab Prezident, ölkənizin milli bayramı – Pakistan Günü münasibətilə Sizə və Sizin simanızda bütün xalqınıza öz adımdan və Azərbaycan xalqı adından ən səmimi təbriklərimi yetirirəm.

    Azərbaycan ilə Pakistanı ortaq mənəvi dəyərlərimizdən qaynaqlanan möhkəm dostluq və qardaşlıq əlaqələri birləşdirir. Qarşılıqlı inam, etimad və dəstəyə əsaslanan dövlətlərarası münasibətlərimiz xalqlarımızın iradəsini bariz şəkildə ifadə edir.

    Bu yaxınlarda ölkənizə etdiyim səfəri, keçirdiyimiz görüşü, apardığımız fikir mübadilələrini məmnunluqla xatırlayıram. İnanıram ki, Azərbaycan-Pakistan strateji tərəfdaşlığının və müttəfiqliyinin daim möhkəmləndirilməsi və inkişafı yolunda səylərimizi bundan sonra da ardıcıl şəkildə davam etdirəcəyik.

    Bu əlamətdar gündə Sizə möhkəm cansağlığı, işlərinizdə uğurlar, qardaş Pakistan xalqına əmin-amanlıq və firavanlıq arzulayıram", - deyə məktubda qeyd olunub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi