Elnur Məmmədov: "Beynəlxalq ədalətin bərqərar olunmasında Türkiyənin səyləri əvəzsizdir"

"Türkiyə qlobal güclərin hesablaşdığı aktora çevrilib. Bu gün beynəlxalq ədalətin bərqərar olunmasında Türkiyənin ardıcıl səyləri danılmaz və əvəzsizdir".

"Report" xəbər verir ki, bunu Azərbaycan xarici işlər nazirinin müavini Elnur Məmmədov Türkiyənin 30 Avqust - Zəfər Bayramına həsr olunan tədbirdə çıxış edərkən söyləyib.

"Xüsusilə qeyd etmək istərdim ki, torpaqlarımızın işğaldan azad edilməsi dövründə bütün təzyiqlərə və təhdidlərə baxmayaraq, Türkiyə dövləti və xalqı haqlı sözümüzün eşidilməsi üçün bizə ən ciddi dəstəyi vermişdi. Türkiyənin ölkəmizə verdiyi siyasi və diplomatik dəstək sadəcə qardaşlığımızın təzahürü kimi deyil, həm də haqqın və ədalətin yanında durması ilə tarixdə öz yerini tapıb", - diplomat vurğulayıb.