Bakıda Qafqaz yəhudilərinin irsinə həsr olunmuş beynəlxalq konfrans keçirilir

Azərbaycan Dillər Universitetində (ADU) “Şimali və Şərqi Qafqaz yəhudilərinin irsi və mədəniyyəti” mövzusunda beynəlxalq konfrans başlayıb.

“Report” xəbər verir ki, tədbirdə Azərbaycan, İsrail, Rusiya, ABŞ, Fransa və digər ölkələrdən 60-dan çox alim-tədqiqatçı iştirak edir.

"Konfransın mövzusu çox önəmlidir. Yəhudilərin əsrlər boyu çəkdiyi iztirablara baxmayaraq, onlar öz keçmişlərini unutmayaraq mədəniyyətlərini qoruyub saxlayıblar. Bu gününü və gələcəyini onun əsasında qururlar”, - konfransın açılışında ADU-nun rektoru Kamal Abdulla bildirib.

Onun sözlərinə görə, Azərbaycan-İsrail münasibətlərində yeni səhifə açılıb.

“Yəhudi irsi mövzusuna toxunmaqla biz həm də Azərbaycan mədəniyyətindən danışırıq, çünki ölkəmizdə digər xalqlar və millətlərlə yanaşı yəhudilər də yaşayır”, - o əlavə edib.