Yuxarı
    Bağlamaq

    Azərbaycan və Norveç arasında viza rejimi sadələşdiriləcək

    Söhbət zamanı iki ölkə arasında münasibətlərin mövcud durumu və inkişaf perspektivləri barədə müzakirələr aparılıb

    Bakı. 3 dekabr. REPORT.AZ/ Dekabrın 3-də “Azərbaycan Respublikası Hökuməti ilə Norveç Krallığı Hökuməti arasında vizaların rəsmiləşdirilməsinin sadələşdirilməsi haqqında Saziş” və “Azərbaycan Respublikası Hökuməti ilə Norveç Krallığı Hökuməti arasında icazəsiz yaşayan şəxslərin readmissiyası haqqında Saziş” imzalanıb. Bu barədə "Report" "AzərTac"a istinadən məlumat verir.

    Sazişlər Azərbaycanın xarici işlər nazirinin müavini Xələf Xələfovun Norveçin ölkəmizdəki səfiri Bord İvar Svendsen ilə görüşündə imzalanıb.

    Sənədlər Azərbaycan və Norveç vətəndaşları üçün vizaların rəsmiləşdirilməsinin sadələşdirilməsini, hər iki ölkənin diplomatik pasporta malik vətəndaşları üçün vizasız rejimi, tələb olunan sənədlərin sayının, müraciətlərə baxılma müddətinin və viza rüsumunun azaldılmasını, Azərbaycan və ya Norveç ərazisinə daxil olmaq, qalmaq və ya yaşamaqla bağlı şərtlərə əməl etməyən, yaxud bu şərtləri artıq yerinə yetirməyən şəxslərin müəyyən edilməsini, onların təhlükəsiz və nizamlı şəkildə qayıtmalarının tez və səmərəli həyata keçirilməsini nəzərdə tutur.

    Görüşdə bildirilib ki, bu sazişlərin imzalanması Azərbaycan və Norveç arasında iqtisadi, humanitar, mədəni, elmi və digər sahələrdə əlaqələrin daha da möhkəmlənməsinə xidmət edəcək.

    Söhbət zamanı iki ölkə arasında münasibətlərin mövcud durumu və inkişaf perspektivləri barədə müzakirələr aparılıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi