Deputat AŞPA-nın Azərbaycan üzrə məruzəçisinin hesabatını tənqid edib

"Məruzəçinin mövqeyi ilə qətiyyən razı deyiləm. Bu müzakirələr yalnız riyakarlıq üzərində qurulub. Burada hakim qismində çıxış edənlər, insan haqlarından danışan bəziləri, öz ölkələrindəki mövcud daxili problemləri, siyasi gərginliyi, demokratik dəyərlərdən çox-çox uzaq olmalarını, korrupsiyanın mövcudluğunu və qonşu dövlətə qarşı yürütdükləri işğalçı siyasətlərini unudaraq, riyakarcasına ədalət məhkəməsi qurublar. Gəlin riyakarlığa son qoyaq!"

"Report"un Fransa bürosu xəbər verir ki, bu fikirləri Azərbaycanın Avropa Şurası Parlament Assambleyasındakı (AŞPA) nümayəndə heyətinin üzvü Sevinc Fətəliyeva qurumun qış sessiyası zamanı Azərbaycanda siyasi məhbuslara dair hesabatın müzakirəsi zamanı bildirib.

Onun sözlərinə görə, xanım məruzəçi Azərbaycandan danışarkən düzgün yanaşma ortaya qoymalıdır: "Hörmətə gəlincə, sizə xatırlatmaq istəyirəm ki, bu qurumun əsas dəyərlərindən biri qarşılıqlı hörmətdir. Əgər Azərbaycan AŞPA-nın qaydalarına və dəyərlərinə tamamilə məhəl qoymasaydı, demokratiyanın inkişafı baxımından heç bir irəliləyiş göstərməsəydi, Azərbaycan Prezidentinin əfv sərəncamları olmasaydı, ədliyyə sistemindəki çatışmazlıqları aradan qaldırmaq üçün Azərbaycan hakimiyyəti güclü iradəsi əsasında geniş islahatlar aparmasaydı və Avropa Şurası ilə sıx əməkdaşlıq etməsəydi, o zaman bu cür yanaşma mümkün olardı. Parlament üzvləri olaraq, biz konkret nəticələr verən bu əməkdaşlığı yüksək qiymətləndiririk və buna görə də hər zaman konstruktiv dialoqun aparılmasını tələb edirik. Bu Assambleyanın məqsədi həm də nəticəyə yönələn əməkdaşlığı lazımi səviyyədə təşviq etmək olmalıdır. Lakin hesabatdakı bəzi geniş əhatəli nəticələr təşkilatla ölkə arasında arzuolunmaz gərginlik yaradır və aydındır ki, bu, tərəflər arasında etimadı sarsıtmaqla əməkdaşlıq və dialoqa töhfə vermir. Ona görə də münasibətlərdə inamın itirilməsinə səbəb ola biləcək bu cür yanaşma nümayiş etdirməkdən çəkinməliyik".

Deputat deyib ki, Avropa İnsan Haqları Məhkəməsinin qərarlarının siyasiləşdirilməsi yolverilməzdir: "Bu məsələdə diqqətli olmalıyıq. Xüsusilə nəzərə almalıyıq ki, Məhkəmə öz qərarlarında "siyasi məhbuslar" kimi bir siyasi anlayışa istinad etmir və bu fakt hesabatda da qəbul olunur. Bu səbəbdən subyektiv mühakimə ilə mübahisəli nəticələr çıxarmaq və Azərbaycanı sərt ittiham etmək yolverilməzdir. Üzv dövlətlərin əksəriyyətinin məhkəmə qərarlarına əməl etməklə bağlı problemləri var. Bu təşkilatın dəyərlərini bölüşən hər kəs qəbul edir ki, məhkəmə qərarları icra olunmalıdır və sorğulana bilməz. Bəli, bu məqsədlə üzv dövlətləri qərarların vaxtında və effektiv şəkildə icrasına təşviq etməliyik. Ancaq bütün ölkəni ağır siyasi ittihamlar və təqsirləndirmələrlə damğalamaqla bunu edə bilmərik. Bir sözlə, məhkəmə qərarları hüquqi məsələlərdir və onlara bu cür münasibət göstərilməlidir".

"Bu Assambleyada mən tez-tez bir sual səsləndirirəm. Əgər Azərbaycandakı insan haqlarının vəziyyəti sizi doğrudan da maraqlandırırsa, o zaman nədən Ermənistan tərəfindən Dağlıq Qarabağın işğalı zamanı qovulmuş 1 milyon qaçqının hüquqlarının pozulması məsələsini qaldırmırsınız? Hər zaman olduğu kimi, sualım yenə də cavabsız qaldı", - o qeyd edib.