Aleksandr Lukaşenko: Azərbaycan son illərdə böyük uğurlara nail olub

Azərbaycan son illərdə böyük uğurlara nail olub.

"Report" BELTA-ya istinadən xəbər verir ki, bunu Belarus Prezidenti Aleksandr Lukaşenko Bakıda Azərbaycan Prezidenti İlham Əliyev ilə danışıqların yekunu üzrə jurnalistlərə açıqlamasında deyib.

Onun sözlərinə görə, Azərbaycan son illərdə, hər şeydən əvvəl, əsas problemini həll etməklə (uzun müddət ərzində sadəcə səhraya çevrilən torpaqlarını qaytarmaqla) çox böyük uğura nail olub: “Bu, çox çətin hekayədir. Amma torpaqlar geri qaytarılıb, onları dirçəltmək lazımdır. Bu, yəqin ki, Azərbaycanın həll etməli olduğu çox uzun və heç də az çətin olmayan bir vəzifə olacaq”.

“Torpaqları qaytarmağınız, onları dirçəltməyiniz əsrlərlə yaddaşlarda qalacaq. Əgər bu böyük bərpa işlərində bizə yer tapsanız, biz bunu böyük məmnuniyyətlə edəcəyik. Üstəlik, qardaş Belarus və Azərbaycan xalqları arasında hörmət, həmçinin münasibətlərimiz sayəsində biz bunu dünyada heç kimin etməyəcəyi şəkildə edəcəyik”, - Belarus lideri vurğulayıb.