Dövlət Turizm Agentliyinin sədri Azərbaycan vətəndaşlarını xarici turistlərə qarşı tolerant olmağa çağırıb

Bakı. 18 oktyabr. REPORT.AZ/ “Azərbaycana turizm axınına cəmiyyətdə müxtəlif reaksiyalar var”.

“Report” xəbər verir ki, bunu Dövlət Turizm Agentliyinin sədri Fuad Nağıyev rəhbərlik etdiyi qurumun və Azərbaycan Turizm Bürosunun təşkilatçılığı ilə keçirilən Milli Turizm Sammitindəki çıxışı zamanı deyib.

“Azərbaycan xalqı həmişə qonaqpərvər və tolerant olub. Biz bütün vətəndaşlarımızı həmişə olduğu kimi, qonaqpərvər və tolerant olmağa çağırırıq. Xarici turistlərə göstərilən xidmətin səviyyəsinin artırılması, onların ölkəmizdən məmnun ayrılması bu sahədə çalışan hər kəsin marağında olmalıdır. Əlbəttə, ölkə üzrə turizmin inkişafını tək BİR qurumla bağlamaq olmaz. Turizm böyük bir çarxdır. Bu çarxın aparıcı qüvvələrinə turizm sahəsində çalışan, bu sahə ilə əlaqəsi olan hər kəsi aid etmək olar. Bu sahədə çalışan hər kəs üzərinə düşən məsuliyyəti hiss etməlidir", - o qeyd edib. 

Xatırladaq ki, bu gün Azərbaycanın yeni turizm brendi ölkə ictimaiyyətinə təqdim olunub.