Bakıda turizm sənayesi subyektlərinin forumu keçirilib

Bu gün Bakıda "İlin yekunları və COP-29 ərəfəsində çağırışlar" mövzusunda turizm sənayesi subyektlərinin forumu təşkil olunub.

"Report" xəbər verir ki, 1 000-ə yaxın iştirakçının qatıldığı tədbirdə çıxış edən "Azərbaycan Turizm Agentlikləri Assosiasiyası" İctimai Birliyinin İdarə Heyətinin sədri Göydəniz Qəhrəmanov 2023-cü ilin ümumilikdə ölkə turizminin inkişafı, turizm sənayesinin bərpası, postpandemiya dövründə Azərbaycanın qlobal turizm arenasında tanıdılması baxımından uğurlu il olduğunu deyib.

O, Prezident İlham Əliyev tərəfindən son 20 ildə turizmin qeyri-neft sektorunun aparıcı qoluna çevrilməsi, ölkəmizin regional turizm destinasiyası kimi tanıdılması istiqamətində aparılan siyasətin turizmin inkişafında əhəmiyyətini vurğulayıb, ölkəmizin bu il BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına - COP29 kimi mötəbər tədbirə ev sahibliyi etməsinin turizm sənayesinin üzərinə yeni vəzifələr qoyduğunu, qonaqların ən yüksək səviyyədə qarşılanması və Azərbaycan haqqında müsbət təəssüratlarla geri dönmələri üçün səfərbər olmağın önəmini diqqətə çatdırıb.

Ölkəyə səfər edən əcnəbi vətəndaşların sayının artırdığını və prioritet bazarların coğrafiyasının ildən-ilə genişləndiyini, bu amilin Azərbaycanda hotel sənayesinin inkişafına müsbət təsir göstərdiyini vurğulayan "Azərbaycan Hotellər Assosiasiyası" İctimai Birliyinin İdarə Heyətinin sədri Eldar Əlimuradov son 20 ildə paytaxt Bakı ilə yanaşı bir sıra bölgələrdə 10-larla müasir hotel və yerləşmə obyektlərinin inşa olunduğunu qeyd edib.

Forumda çıxış edən "Azərbaycan Bələdçilər Assosiasiyası" İctimai Birliyinin baş katibi Tural Musayev Azərbaycan tarixinin, mədəniyyətinin, memarlığının, kulinariyasının və turizmə bağlı digər sahələrin ölkəyə səfər edən əcnəbi qonaqlara tanıdılmasında bələdçilərin xüsusi rol oynadığını, bu peşəyə ildən-ilə marağın artdığını, bələdçiliyin artıq həvəskarlıqdan çıxaraq peşəkarlaşdığını bildirib. O, ölkədəki sabitlik və təhlükəsizlik amilinin əcnəbi turistlər tərəfindən yüksək dəyərləndirilidiyini vurğulayıb.

Suverenliyimizin və ərazi bütövlüyümüzün tam bərpasından sonra Azərbaycanın ölkə xaricində təbliğində turizm blogerlərinin daha geniş və sərbəst şəkildə tanıtım kompaniyaları həyata keçirdiyini qeyd edən "Azərbaycan Turizm Blogerləri Assosiasiyası" İctimai Birliyinin İdarə Heyətinin sədri Azər Qəribov bu formatlı təbliğat tədbirlərinin gələcəkdə də coğrafiyasının genişləndiriləcəyini bildirib.

Tədbir "Turizmin inkişafında biznes-dövlət əməkdaşlığı, son 20 il ərzində əldə edilən uğurlar" və "COP-29 ərəfəsində imkanlar və çağırışlar, turizm sənayesindən gözləntilər" mövzusunda panel müzakirələrlə davam edib, turizm nümayəndələrini maraqlandıran suallar cavablandırılıb.

Forum çərçivəsində turizm sənayesi üzrə fəaliyyət göstərən ictimai birliklər adından Prezident İlham Əliyevin siyasətinin davam etməsini arzulayan birgə bəyanat qəbul edilib. Bəyanatda dövlət başçısı tərəfindən aparılan siyasətə tam dəstək ifadə olunub.