Bakıda "Perio Master Clinic” konfransı keçiriləcək

2026-cı ildə Bakıda Avropa Parodontologiya Federasiyasının “Perio Master Clinic” konfransı keçiriləcək.

"Report" xəbər verir ki, bu barədə Dövlət Turizm Agentliyi məlumat yayıb.

Məlumata görə, bu barədə qərar Federasiyanın aprelin 1-də Danimarkanın Helsingor şəhərində keçirilmiş Baş Assambleyasında təşkilata üzv olan Avropa ölkələrinin gizli səsverməsi nəticəsində qəbul edilib.

Konfransda ölkəmizi Azərbaycan Turizm Bürosunun dəstəyi ilə Əziz Əliyev adına Azərbaycan Dövlət Həkimləri Təkmilləşdirmə İnstitutunun stomatologiya və üz-çənə cərrahiyyəsi kafedrasının dosenti, Azərbaycan Parodontologiya Cəmiyyətinin prezidenti Cavid Əhmədbəyli təmsil edib və o, Bakı şəhərinin işgüzar tədbirlər üzrə potensialı ilə bağlı təqdimatla çıxış edib. Tədbirin sonunda konfransın 2026-cı ilin 6-7 mart tarixlərində Bakı Konqres Mərkəzində keçirilməsi səs çoxluğu ilə təsdiq edilib. Konfransa ev sahibliyi etmək uğrunda mübarizə Bakı və Finlandiyanın paytaxtı Helsinki arasında bir ilə yaxındır davam edirdi.

Konfransın sədrlik Cavid Əhmədbəyliyə, elmi komitənin sədri vəzifəsi isə İspaniyanın Madrid Komplutense Universitetinin professoru Mariano Sanza həvalə edilib. Tədbir mindən çox beynəlxalq iştirakçını Azərbaycana cəlb edəcək.

1991-ci ildə təsis edilən və Avropada 16 minə yaxın ağız boşluğu sağlamlığı mütəxəssislərinin və alimlərinin üzv olduğu 37 milli parodontologiya cəmiyyətini özündə cəmləşdirən Avropa Parodontologya Federasiyası tibbin parodontologiya sahəsi üzrə elmi və diş əti sağlamlığının əhəmiyyətini təbliğ edən, əsas şüarı “Daha yaxşı həyat üçün sağlam diş əti” olan nüfuzlu beynəlxalq təşkilatdır.

2017-2022-ci illərdə Avropa Parodontologiya Federasiyasının assosiativ üzvü, 2022-ci ildən isə tamhüquqlu üzvü olan Azərbaycan Parodontologiya Cəmiyyətinin məqsədi ölkəmizdə parodontologiyanın inkişafına yardım etmək, həkimlərə və ictimaiyyətə dişlər və implantlar ətrafında diş əti sağlamlığının qorunub saxlanması və diş əti xəstəliklərinin ciddiyyəti, bu xəstəliklərin müasir biliklərə əsaslandırılmış erkən diaqnostikası və müalicəsinin əhəmiyyətini gündəmə gətirməkdən ibarətdir.