Azərbaycandan turist axını 15 %-dən çox artıb

2024-cü ildə xarici ölkələrə gedən Azərbaycan vətəndaşlarının ümumi sayı 2023-cü illə müqayisədə 15,5 % artaraq 2158,9 min nəfər olub.

Bu barədə “Report” Dövlət Statistika Komitəsinə istinadən xəbər verir.

Məlumata görə, vətəndaşların 41 %-i Türkiyəyə, 20,7 %-i Rusiyaya, 8,7 %-i Gürcüstana, 8,7 %-i İrana, 20,9 %-i digər ölkələrə səfər edib. Gedənlərin 63,8 %-ni kişilər, 36,2 %-ni qadınlar təşkil edib.

Son 1 ildə İrana gedən Azərbaycan vətəndaşlarının sayı 32 %, Rusiyaya gedənlərin sayı 11,6 %, Gürcüstana gedənlərin sayı 11,5 %, Türkiyəyə gedənlərin sayı 8,5 % artıb.

Ötən il xarici ölkələrə səfər edən Azərbaycan vətəndaşlarının 69,4 %-i hava, 28,5 %-i dəmir yolu və avtomobil, 2,1 %-i isə dəniz nəqliyyatından istifadə edib.