Azərbaycan Özbəkistan vətəndaşlarının ən çox səyahət etdikləri ölkələr sırasındadır

Azərbaycan bu ilin əvvəlindən Özbəkistan vətəndaşlarının ən çox səyahət etdikləri ölkələrin ilk onluğunda yer alıb.

“Report”un məlumatına görə, bu barədə Özbəkistanın Statistika Agentliyinin açıqladığı rəqəmlərdə deyilir.

Belə ki, bu ilin yanvar-may aylarında 8,3 min Özbəkistan vətəndaşı Azərbaycana səfər edib.

Ümumilikdə isə bu dövrdə 1,6 milyon nəfər Özbəkistan vətəndaşı turist kimi ölkə xaricinə səfər ediblər.

Özbəkistan vətəndaşlarının ən çox səfər etdikləri ölkə Qırğızıstandır. Bu il ərzində 650,7 min vətəndaş bu ölkəyə səfər edib. İlk üçlükdə Tacikistan və Qazaxıstan yer alıb. Bu dövr ərzində 422 min Özbəkistan vətəndaşı Tacikistanda, 255,7 min nəfər isə Qazaxıstanda olublar.

Özbəkistan vətəndaşlarının səfər etdikləri ölkələrin ilk beşliyində Rusiya (65,1 min) və Birləşmiş Ərəb Əmirlikləri (59 min) qərarlaşıb.

Sonrakı yerləri isə Türkiyə (52,7 min), Səudiyyə Ərəbistanı (24,4 min), Küveyt (20,7 min) tutur.

İlk onluğu isə Misir və Azərbaycan qapayır. Belə ki, bu ilin yanvar-may aylarında Misirə 9,1 min Özbəkistan vətəndaşı səfər edib.