Yuxarı
    Bağlamaq

    "Təmiz Şəhər" ASC AzMİU tələbələrinə tullantıların toplanması və daşınması prosesini öyrədir

    Təmiz Şəhərin AzMİU-da təşkil etdiyi seminarlar artıq ənənəvi hal alıb

    Bakı. 20 aprel. REPORT.AZ/ "Təmiz Şəhər" ASC-nin nümayəndəsi Azərbaycan Memarlıq və İnşaat Universitetində (AzMİU) mühazirə deyib.

    ASC-nin mətbuat xidmətindən "Report"a verilən məlumata görə, qurumun universitetdə yaratdığı Təmiz Şəhər Mərkəzində çıxış edən Sabit Zeyniyev tələbələrə Qala qəsəbəsi timsalında "Bərk məişət tullantılarının toplanması və daşınmasının təşkili" mövzusuna geniş məlumat verib.

    Qeyd olunub ki, bu qəsəbədə Heydər Əliyev Fondunun təşəbbüsü və dəstəyi ilə "Təmiz Şəhər" ASC "Təmiz Qala" adlı pilot layihə icra edir. Layihə əsasında qəsəbədə məişət tullantıları sakinlərin də iştirakı ilə çeşidlənmiş formada-qida və qeyri-qida tullantıları olaraq iki hissəyə bölünərək toplanır. ASC-nin tullantı daşıyan avtomobilləri isə fərqli tullantı qutularını növlərinə görə ayrı-ayrılıqda yığaraq daşıyır. Bu formada toplanma və daşınma həmin tullantı materiallarının təkrar emala cəlb olunan hissəsinin artmasına səbəb olur.

    "Təmiz Şəhər" mütəmadi olaraq qəsəbədə tullantılarla rəftarla bağlı maarifləndirmə işləri də həyata keçirir. Qala məktəblərində xüsusi dərslər, məhəllələrdə sakinlərlə görüşlər və s. formalı tədbirlər əhalinin görülən işə dəstəyinin artmasına səbəb olur.

    "Təmiz Şəhər"in AzMİU-da təşkil etdiyi seminarlar isə artıq ənənəvi hal alıb. Bu, universitetlə səhmdar cəmiyyət arasında bağlanmış əməkdaşlıq müqaviləsinə əsasən təşkil olunur.

    Razılaşmaya əsasən universitetdə birgə elmi-texniki baza yaradılmış, nəzəri və praktiki bilik və təcrübələr mübadiləsi həyata keçirilir. "Təmiz Şəhər" bakalavrlar üçün istehsalat təcrübələri, uyğun ixtisaslaşmalar üzrə magistrların elmi-tədqiqat işlərinin təşkilinə şərait yaradır. Tələbələr yüksək hazırlığa malik olmaları üçün ASC-nin zavodlarında istehsalat təcrübələrində iştirak edirlər.

    "Təmiz Şəhər" ASC maarifləndirmə siyasəti çərçivəsində ölkədəki əksər təhsil ocaqları ilə müxtəlif formalı əməkdaşlıqlar edir. Səhmdar cəmiyyət bununla şagird və tələbələrin tullantıya baxışını, onunla rəftarını formalaşdırmağa, uyğun ixtisas tələbələrinin isə bu sahədə peşəkar yetişməsinə dəstək olmağa çalışır.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi