Yuxarı
    Bağlamaq

    Nazir: “Bu il Azərbaycanda sosial müdafiə sisteminin gücləndirilməsi istiqamətində növbəti addımlar atılacaq”

    Səlim Müslümov Biləsuvarda 5 rayonun sakinlərini fərdi qaydada qəbul edib

    Bakı. 13 yanvar. REPORT.AZ/ Əmək və əhalinin sosial müdafiəsi naziri Səlim Müslümov Biləsuvar rayonunda vətəndaşları qəbul edib.

    Nazirliyin İctimaiyyətlə əlaqələr şöbəsindən “Report”a verilən məlumata görə, qəbulda Beləsuvar, Neftçala, Cəlilabad, Salyan, Cəbrayıl rayonlarının sakinləri iştirak edib. 

    Vətəndaşların əmək hüquqlarının müdafiəsi, imtiyazlı şəxslərin dövlət büdcəsi hesabına mənzillə, reabilitasiya vasitələri ilə təminatı, məşğulluq, bərpa müalicəsinə köməklik göstərilməsi, əmək pensiyası və digər sosial təminat növlərinə hüququn müəyyən olunması və s. məsələlərlə bağlı müraciətləri dinlənilib. Müraciətlərdə əksini tapan məsələlər obyektiv şəkildə araşdırılıb, ayrı-ayrı müraciətlərlə bağlı hüquqi izahatlar verilib. 

    Qəbul zamanı S.Müslümov vurğulayıb ki, dünya iqtisadiyyatında çətinliklərin yaşandığı ötən ildə olduğu kimi, cari ildə də Azərbaycanda sosial müdafiə sisteminin gücləndirilməsi istiqamətində növbəti addımlar atılacaq. Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında Azərbaycan Prezidenti İlham Əliyevin qeyd etdiyi kimi, “2016-cı ildə sosial məsələlər də öz həllini tapıb. Sosial siyasət daim bizim əsas prioritetlərimizdən biri olub. 2016-cı ildə maaşlar 7 faiz, pensiyalar 8 faiz artıb. Yenə də artmalıdır. Hesab edirəm ki, 2017-ci ildə də bu istiqamətdə müsbət dinamika olacaq”.

    İmtiyazlı şəxslərin dövlət hesabına mənzillə təminatına dair müraciətlərini cavablandıran S.Müslümov bu sahədə işlərin davam etdirildiyini diqqətə çatdırıb: “Prezidentin 20 iyun 2014-cü il tarixli Sərəncamına uyğun olaraq görülən işlər çərçivəsində son iki ildə Biləsuvar, Neftçala, Cəlilabad, Salyan rayonlarında 40-a yaxın fərdi yaşayış evi tikilərək Qarabağ müharibəsi və şəhid ailələrinə verilib. Həmin rayonlar üzrə daha 20-dək evin tikilməsi nəzərdə tutulub ki, onlardan bir çoxu artıq inşa edilir”.

    Nazirliyin struktur bölmələrinin və qeyd olunan rayonlar üzrə qurumlarının rəhbər şəxslərinin iştirakı ilə keçirilən qəbulda müraciətlərinə əsasən, bir sıra vətəndaşların məşğulluğunun təmin olunması üçün konkret tədbirlər görülüb. Onlara müvafiq ərazi üzrə boş (vakant) iş yerləri təqdim edilib, seçdikləri və əmək bacarıqları uyğun gələn iş yerlərinə göndərişlər verilib. 

    S.Müslümov son bir ildə Biləsuvar, Neftçala, Cəlilabad, Salyan, Cəbrayıl rayonları üzrə 3 min nəfərədək şəxsin nazirliyin məşğulluq orqanları vasitəsilə işlə təmin edildiklərini bildirib: “Eyni zamanda bu rayonlar üzrə 102 nəfər işsiz və işaxtaran şəxs özünüməşğulluq proqramı üzrə təlimlərə cəlb edilib. Qiymətləndirmə prosesində onlardan 84 nəfərin biznes-planları uğurlu hesab edilib və həmin şəxslərin ailə bizneslərinin mal və materiallar formasında dəstəklənməsi təmin olunacaq”. 

    Qəbul zamanı müraciətinə əsasən bir nəfərə əlil arabası təqdim edilib, ayrı-ayrı vətəndaşların ehtiyaclarına uyğun olaraq müxtəlif reabilitasiya vasitələri ilə təmin olunmaları, nazirliyin aidiyyəti müəssisələrində bərpa müalicəsinə, peşə hazırlığı və əlavə təhsil kurslarına cəlb edilmələri və s. barədə tapşırıqlar verilib.

    Vətəndaşlar ölkədə dayanıqlı iqtisadi inkişafın təmin edilməsi, respublikanın bölgələrinin tərəqqisi və sosial infrastrukturun yaxşılaşdırılması, kənd təsərrüfatının inkişaf etdirilməsi və bununla kənd rayonları əhalisinin məşğulluq və gəlir imkanlarının artırılması, sosial müdafiə tədbirlərinin gücləndirilməsi və s. sahələrdə aparılan mühüm işlərə görə Azərbaycan Prezidenti İlham Əliyevə minnətdarlıqlarını ifadə ediblər.

    Qəbul zamanı nazirliyin səlahiyyət dairəsinə aid olmayan müraciətlərdə əksini tapan məsələlər aidiyyəti qurumlara çatdırılmaq üçün qeydiyyata alınıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi