Yuxarı

İnsan alveri qurbanı olan 30-a yaxın şəxsə yardım edilib

Həmçinin 5 nəfərin peşə reabilitasiyasına cəlb edilməsi təmin olunub

Bakı. 2 aprel. REPORT.AZ/ Əmək və Əhalinin Sosial Müdafiəsi Nazirliyinin (ƏƏSMN) İnsan Alveri Qurbanlarına Yardım Mərkəzi cari ilin yanvar-mart aylarında DİN-in İnsan Alverinə qarşı Mübarizə Baş İdarəsi tərəfindən yönləndirilən 19 nəfər insan alveri qurbanına və insan alverinin qurbanına çevrilmək təhlükəsi olan 10 nəfər şəxsə müvafiq yardımlar göstərib. Bu barədə "Report"a nazirliyin İctimaiyyətlə əlaqələr şöbəsindən məlumat verilib.

Həmin şəxslərdən 4 nəfərinin ƏƏSMN yanında Dövlət Məşğulluq Xidməti tərəfindən məşğulluğunun təmin olunmasına, 5 nəfərinin peşə reabilitasiyasına cəlb edilməsinə, 4 nəfərinin hüquqi və 2 nəfərinin tibbi yardım almasına, 1 nəfərinin ailəsinə ünvanlı dövlət sosial yardımı təyin edilməsinə və s. köməkliklər göstərilib. Onların bir qismi zəruri hallarda eyni vaxtda bir neçə yardım növü ilə əhatə olunublar.

Həmin şəxslərdən əksəriyyətinin sosial reabilitasiyasına nail olunub, habelə insan alverinin qurbanına çevrilmək riski aradan qaldırılıb. Hazırda 13 nəfər insan alveri qurbanı və potensial insan alveri qurbanı ilə işlər davam etdirilir. Bununla yanaşı, insan alveri ilə bağlı ictimai məlumatlılığın artırılması üçün mərkəz tərəfindən müxtəlif formalarda maarifləndirmə işləri də aparılıb. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi