Bakı. 16 yanvar. REPORT.AZ/ Azərbaycan Milli Elmlər Akademiyası (AMEA) Mərkəzi Elmi Kitabxanasında (MEK) “İnformasiya təminatı sahəsində davamlı əməkdaşlığın qurulması” mövzusunda tədbir keçirilib.
"Report" xəbər verir ki, tədbirdə AMEA-nın Yusif Məmmədəliyev adına Neft-Kimya Prosesləri İnstitutunun direktoru, akademik Vaqif Abbasov Azərbaycanın insan hüquqları üzrə müvəkkilinin (Ombudsman) ölkədə hüquqi maarifləndirmə istiqamətində gördüyü işlərdən danışıb.
MEK-in direktoru Leyla İmanova Ombudsman Aparatının elektron nəşrlərdən ibarət kolleksiyasını kitabxanaya təqdim etməsini yüksək dəyərləndirib.
Ombudsman Elmira Süleymanova Azərbaycanda insan hüquq və azadlıqları istiqamətində görülən işləri diqqətə çatdırıb, MEK-də sənədlərin toplanılmasının, qorunub saxlanılmasının əhəmiyyətini qeyd edib. O, rəhbərlik etdiyi qurumun elektron nəşrlərinin MEK-ə təqdim olunmasının informasiya siyasəti baxımından düzgün seçim adlandırıb.
Sonra Ombudsman Aparatının elektron nəşrlərdən ibarət kolleksiyası MEK-ə təqdim olunub.
Tədbir mövzu ətrafında məruzələrlə davam edib.