Yuxarı

Göyçayda Regional Peşə Tədris Mərkəzi əsaslı təmir və yenidənqurmadan sonra istifadəyə verilib

Səlim Müslümov: Yeni mərkəz il ərzində 6 rayon üzrə 800 nəfərədək vətəndaşın peşə hazırlığı və əlavə təhsilə cəlb edilməsinə imkan verəcək

Bakı. 20 noyabr. REPORT.AZ/ Əmək və Əhalinin Sosial Müdafiəsi Nazirliyinin Göyçay rayonunda Regional Peşə Tədris Mərkəzi əsaslı təmir və yenidənqurmadan sonra istifadəyə verilib. Bu barədə "Report"a nazirliyin İctimaiyyətlə əlaqələr şöbəsindən məlıumat verilib.

Tədbirdə iştirak edən əmək və əhalinin sosial müdafiəsi naziri Səlim Müslümov bildirib ki, əmək ehtiyatlarından məqsədyönlü istifadə edilməklə əhalinin səmərəli məşğulluğunun təmin olunmasına nail olunması üçün həyata keçirilən tədbirlərin bir istiqaməti də işçi qüvvəsinin keyfiyyətcə yüksəldilməsi və rəqabət qabiliyyətinin yüksəldilməsidir. Nazir deyib ki, bu tədbirlər işçilərin əmək bazarına çıxış imkanlarının artırılmasına, əmək bazarında tələb və təklif arasında dinamik uyğunluğun təmin edilməsinə yönəlib: "Son illərdə beynəlxalq və milli əmək bazarının tələblərinə cavab verən meyarlar əsasında peşə və kvalifikasiya standartları hazırlanaraq işəgötürənlərin istifadəsinə verilir. Bununla yanaşı, işsiz və işaxtaran vətəndaşların peşə hazırlığının təmin olunması diqqətdə saxlanılır və əmək bazarının tələblərinə uyğun olaraq 70-dən çox müxtəlif peşə üzrə ənənəvi peşə təlimi metodları və həmçinin modul tədris üsulu əsasında peşə hazırlığı və əlavə təhsil kursları təşkil olunur. Nazirlik ötən il 3786 nəfər, cari ilin yanvar-oktyabr aylarında isə 3493 nəfər işaxtaran vətəndaşın bu kurslara cəlb olunmasını təmin edib".

S.Müslümov qeyd edib ki, peşə hazırlığı işinin maddi-texniki bazasının gücləndirilməsi bu gün nazirliyin fəaliyyətində mühüm yer tutur: "Bununla əlaqədar Dünya Bankı ilə birgə icra olunan "Sosial Müdafiənin İnkişafı" Layihəsi çərçivəsində son vaxtlarda nazirliyin Bakı şəhərindəki Regional Peşə Tədris Mərkəzində əsaslı təmir və yenidənqurma işləri aparılıb. Burada əlavə sinif otaqları və emalatxana yaradılıb, ümumilikdə mərkəzdə ayrı-ayrı peşələrin təlimi üçün sinif otaqları və emalatxanaların sayı 23-ə çatdırılıb, mərkəz ayrı-ayrı peşələrin təlimi üçün lazımi texniki və tədris vəsaitləri ilə də təmin olunub. Bu istiqamətdə işlər Göyçay rayonundakı Regional Peşə Tədris Mərkəzində də davam etdirilib".

Nazir bildirib ki, layihə çərçivəsində əsaslı təmir və yenidənqurma işləri aparılan Göyçay Regional Peşə Tədris Mərkəzi hazırda 43 otaqdan ibarətdir ki, onlardan 17-si emalatxana və sinif otaqlarıdır: "Burada rayon Məşğulluq Mərkəzi üçün inzibati otaqlar, digər rayonlardan peşə təliminə cəlb olunmuş şəxslər üçün yataq otaqları və s. vardır. Göyçay Regional Peşə Tədris Mərkəzi ümumilikdə 522 min nəfərdən çox əhalisi olan 6 rayon, yəni Göyçay, Ucar, Zərdab, Ağdaş, Ağsu və İsmayıllı rayonları üzrə hər il 800 nəfərədək işaxtaranı müvafiq peşələr, o cümlədən avtomobillərin təmiri üzrə çilingər, qaynaqçı, xalçaçı, bərbər, plastik məmulatlardan yığıcı çilingər, çörəkçi, qənnadçı və s. peşələr üzrə peşə hazırlığı və əlavə təhsil kurslarına cəlb etməyə imkan verəcək. Bu isə bölgədə işaxtaran şəxslərin yeni peşə bacarıqlarına yiyələnməklə əmək bazarına daha asan daxil olmalarında, əmək bazarında tələb və təklifin uyğunlaşdırılmasında öz müsbət rolunu oynayacaq".

Dünya Bankının Azərbaycan nümayəndəliyinin rəhbəri Larisa Lesçenko işaxtaran vətəndaşların məşğulluq imkanlarına malik olmaları üçün onların əmək potensialının keyfiyyətcə yüksəldilməsinin vacib şərtlərdən olduğunu qeyd edib. O, bununla bağlı olaraq Azərbaycanda əmək bazarının tələbləri əsasında peşə təlimi sisteminin təkmilləşdirilməsi yönündə aparılan işlərin təqdirəlayiq olduğunu və "Sosial Müdafiənin İnkişafı" Layihəsinin bu işlərə dəstək verməkdə davam edəcəyini vurğulayıb.

Daha sonra tədbir iştirakçıları tərəfindən Regional Peşə Tədris Mərkəzində peşə hazırlığının səmərəli təşkili üçün yaradılmış şərait, sinif otaqları və emalatxana, tədris ləvazimatları, peşə təlimi prosesi nəzərdən keçirilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi